Amoreuse liedekens
(na 1613)–Anoniem Amoreuse liedekens–
AuteursrechtvrijOp de wijse: Alst begint.
FOrtuyn eylaes bedroeft
Maeckt ghy tot alder stont
Een hert dat troost behoeft
Met Venus strael doorwont
Weest niet ghelijck een steen,
Aenhoort mijn claghen groot,
Ick blijf u lief alleen,
Getrou tot inder doot.
Ist dat ick lief eerbaer
V eenichsins behaech,
Ick salt doen blijcken klaer
Die liefde die ick tot u draech,
Gehstadich ende reyn,
Is sy voorwaer gheseyt,
Schoon suyver liefste greyn
Tot uwen dienst bereyt.
Aensiet schoon lief expaert
Mijn lijden en groot ghequel,
Dus toont der Vrouwen aert
En weest my niet rebel,
Want ick nu anders gheen
Reyn Roosken excellent,
Dan u int herte meen,
Eerlijck en pertinent.
Die eet, drinckt, noch en rust
Om u reyn Maechdelijn soet,
Sijn lijden liefken blust
Troost hem al metter spoet,
Laet hem sijn u dienaer
Reyn Roosken delicaet,
Accoort met u lief een paer
Troost hem eert valt te laet.
Rustich lief van ghemoet
Sijt ghy certeyn 'tis waer,
V woorden seer soet
Sy klincken als een snaer,
Ghy zijt seer fraey van ganck,
Lief u Koraele mont
Een wel-luydende sanck
Heeft mijn jonck hert doorwont.
| |
[pagina 48]
| |
Ick sorch schoon Liefste greyn
Dat ick doe verlooren pijn,
Ghy zijt mijn Lief alleyn
Troost mijn eer ick verdwijn,
Al door u soet aenschijn,
Het is in uwer macht,
Laet my u dienaer zijn
Eer my die doot versmacht.
Och waert ghy toch een vroet
Want ick om u liefde jent,
Groote pijne lijden moet
In desen tijt present,
Ghy staet int herte gheprent
Neemt my in u behoet,
Mijn liefde is Godt bekent,
Op u rust sin en moet.
Adieu reyn Maechdelijn zaet
Adieu Princesse fier,
Ick sterf lief desolaet
In sulcken swaer dangier,
Dat door u fel bestier
Lief door u soete praet,
Blust in my Venus vyer
En komt mijn Lief te baet.
|
|