Amoreuse liedekens
(na 1613)–Anoniem Amoreuse liedekens–
AuteursrechtvrijOp de wijse: Vande blauwe Schuyt: Of danckt God den Heere.
EEn aerdich Vrouken heeft my bedrogen
Daer ick op was vergeckt,
Haer smekende woorden zijn al gelogen,
Dat vinde ick nu perfeckt.
Sy is my doortreckt
Te dobbelt oock van gronde,
Dus keer ick my van haer,
Sy payter so veel met haren valschen monde,
Ick en achtse niet een hayr.
Ghesellekens wilt u sinnekens keeren
Van sulcken schoon samblant,
Want zy sal u pluycken en Minne leeren
Ia hebdijt wel in die hant,
Daer of heb ick verstant
Gaet Vlaenderen heel int ronde,
Gheen Wijf soo wanckelbaer,
Sy payter soo veel met haren valschen monde
Ick en achtse niet een hayr.
Nu laet ick een ander zijn goet verquisten,
Van sinne jonck en mal,
Want syder met haerder subtijlder listen
V seer wel plucken sal,
Ende vallen eenen val,
Dits dagelijcx bevonden
Met haer, nu hier nu daer
Zy payter so veel met haren valschen monde,
Ick en achtse niet een hayr.
| |
[pagina 45]
| |
Wat heb ick met haer al tijts versleten
Ick en spaerde Gelt noch goet,
Nu ben ick vanden back ghebeten
Ick en weet niet wiet my doet
Te hooren haer fakonde,
Dat segghe ick voorwaer
Zy payter so veel met haer valschen monde
Ick en achtse niet een hayr.
Ionckvrouwe ghy laet nu voor u knielen
Ghy zijt daer door bekent,
Al in een Rosbaer met drie Wielen
Sult ghy nemen u ent,
En ick triumpheren jent,
Als ghy tot allen stonden
Sult sitten in lijden swaer
Zy payter so veel met haer valschen monde
Ick en achtse niet en hayr.
Adieu ghy waert mijn Princesse
Met uwen Sneeu witte Keel,
Adieu ghy paeyter wel vijve of sesse
Mest Hannen en Wuyten wel,
Adieu mijn dubbelt vel
Dies keer ick van u omme
Dus ick en vraech nergens naer,
Zy paeyter so veel met haren valschen monde
Ick en achtse niet een hayr.
|
|