Amoreuse liedekens

Een oudt Liedeken.
[De Mey die wil ons bringen]

DE Mey die wil ons bringen
En schencken die koele Wijn,
Met lusten willen wy singhen
En loven Ionc-vroukens fijn,
En breyen van Peerlen een Krancelijn,
Dat willen wy schencken de schoone jonckvrouwen
Dat sy behouden den prijs.

Dat zijn Lelien ende Roosen,

Ende ander Bloemkens goet,
Fioletten ende Tyteloosen
Die anders van verwe zijn,
Daer en boven bloeyt ons de edele Mey,
Al boven des Meys virtuyten
Prijse ick Ionck-vroukens fijn.

Stont daer een dooren van Elpen been,

Daer toe een Boomgaert schoon,
Een Tempel van Karbonckel-steen
Daer beneven een gulden Kroon,
Ende elcke een Krystal,
Nochtans prijse ick schoone Vrouwen
Dien prijse ick boven al.

Mijn Vader wilde mijn schelden

[p. 25]

 

Grijs grau was hem zijn Baert,

 

De Mey wilden hy op helden

 

Al boven Ionc-vrouwen aert,

 

O Vader ghy zijter van ouderdom grijs,

 

Vergangen is u dat minne spel,

 

Geeft ghy den Mey den prijs.

 

Och Soone liefste Soone mijn

 

Gevanghen soo salstu zijn,

 

Prijst ghy de schoone vrouwen

 

Al boven den edelen wijn,

 

Daer toe komt my te hulpe keele Mey,

 

Ick sal u gants verwinnen

 

Met alsoo menigerley.

 

Als ons die winter is verganghen

 

Daer nae comt ons de Mey,

 

De Voghelen singhen schoone

 

Haer tale is menigerley,

 

Waerlijcken staet mijn lief in mijn ghedacht

 

Schoone Ionc-vrouwen salmen minnen

 

By daghe en ooc by nacht.

 

Prince dit Liedeken is ter eeren

 

Van alle Ionck-vrouwen fijn,

 

Laet ons haer lof vermeeren

 

Die van herten amoreus zijn,

 

Haer mondelijn als een Kristal,

 

Sy maeckt soo menich jonck herteken

 

Vrolijc, om datmense prijsen sal.