Die hystorie dat leuen ende dat regiment des alre grootsten ende machtichsten conincx Alexander die heere ende prince was van alle die werelt

Hoe Alexander mit Darius at Ca. xxv

[A]Lexander lach lange mit sijn heer op die ryuiere genaemt die strange. ende hi wort te raede dat hi seluer spreken wilde mitten coninc Darius Ende hij nam mit hem Emendus die bi hem was ende noch een ander ende hi voer haestelic totter ryuiere strange die tusschen beyde die heren liep Nv is die ryuiere van sulcke nature dat sij dicke bi nachte ende bi daghe bevriest dat daer een geladen wagen ouer varen mach Alexander liet Emendus daer bliuen ende hi reet tot Darius die sijn heer op die tijt al omme voor besyen hadde Ende als alexander Darius te gemoete quam. soe gruette hi hem nader zeden vanden lande ende seide Heer Alexander heeft mi aen v gesonden dat ghi hem ontbiet den dach dat ghi striden wilt ende cort. Want men seit dat mijn heere node strijdet om dat hi vermoyet is Ende aldus beual hi mi dit dii te seggen Hier op antwoorde Darius ende seide Ick gheloue dat ghi seluer

[fol. d4v]

alexander bent Want nyemant anders en soude ons so stoutelijc te voren derren leggen van striden Alexander lochendet ende hi seide dat hi sijn bode was Doe nam hem Darius bider hant ende hi leyde hem in sijn tente ende deden mit hem eten aen sijne tafele Ende hi wilde immer dat alexander wt sinen nap dranc: ende hi stacken in sinen bosem Dit mercte een man ende hi seidet Darius Doe seide Darius dat hi dorperlic dede dat hi sinen nap nam Alexander antwoorde hem Heere dit en is gheen scande in alexanders hof. Want alle die tot sijnre tafelen sitten. soe sijn die nappen hare daer si wt drincken Binnen desen bedacht hem Passarges dat dit alexander seluer was. want hi hadden voormaels dicke in Philippus huyse gesien Doe mercte alexander dit: ende hi ontreet mitten nappe: ende hi doerstac den knecht die sijn paert hildt mitten swaerde Ende aldus ontreet hi mit groter auenturen. want hem en mocht nyemant volghen Darius bedreef groot misbaer om dat hem sijn vyant ontreden was. Ende alexander quam tot sijnen luden ende vertelde hoe hi mit Darius at. ende hi toende den nap die hi hem ontdragen hadde tot een litteyken Hier om waren sijn luden zeer blijde dat hem dese vromicheyt geuallen was: mer Darius was droeue