Die hystorie dat leuen ende dat regiment des alre grootsten ende machtichsten conincx Alexander die heere ende prince was van alle die werelt

Hoe Alexander ons heren naem aenbede: Capittel xxij.

[H]Ier geuiel dat nyemant van alle den ghene die den coninc volchden ghemeent en hadde Want doe alexander den prince vanden papen ansach gecleedt mit des bisscops gewaden Ende op sijne myter die gulden plaete daer ons heren naem Tetagramaton in ghegroueret was Soe gedochte hi gods die hem openbaerde daer hi in sijn bedde lach ende die hem beloeft hadde dat hi hem helpen soude dat hi wonne dat rijck van Oesten Doe stont Alexander haestelic van sinen paerde ende hi ghinc alleen tot voor den prince vanden papen. ende hij viel langhes voor hem op die aerde. ende aenbede ons heeren naem ende hi dede den bisscop eere. Die princen van sinen here hadden des alte groot wonder: ende sij meenden dat des conincx herte in bedwanghe gheweest hadde Maer Pertemeus die sijn sonderlinge vrient was vraechde hem: waer om dat hi der ioden pape angebeden hadde Die coninc antwoorde hem ende seide Ic en aenbede den pape niet: maer ic aenbede god wyens dienste dat hi doet Want doe ic was in Lycie in Macedonien landt soe sach ic hem in desen habite Ende doe ic pensde of ic soude mogen verwinnen soe hiet hi mi dat ic gelouen soude: want hi soude mijn heer geleyden ende leueren int rijck van Persen

[fol. d2r]

Want eerst sach ic in desen pape sijn gelikenisse ende ic heb dat vast geloue dat mi geschieden sal dat hi mi beloeft heeft. Hier om aenbede ic gode ende ic dede den man eere Doe dede Alexander sijn heer after trecken. ende hi voer mit luttel luden in Iherusalem ende dede gode offerhande inden tempel alsoe hem Iadus die prince vanden papen wijsde ende hiete Doe brochten sij voorden coninc Daniels boeken ende toenden hem datter in gescreuen was hoe dat een Griex coninck die mach van Persen tonder doen soude Alexander was hier om zeer blijde. want hi hoepte dat dit van hem geseit was Ende des anderen daechs dede hi dat volck vergaderen ende hiet hem eyschen wat sij wilden Ende om haer versoeck so oerlouede hi hem dat die ioden alle die werelt doer waer sij waren haer wet houden mochten: ende hi scout hem quijt van alle tribuyten vanden seuenden iare om die vierten vanden lande Hier nae toech hi totten anderen steden waert Als die van Samarien saghen die grote miltheit ende gauen die alexander den ioden gedaen hadde. soe quamen sij tot hem ende seiden dat sij der ioden magen waren Ende sij rekenden haer geboerten van effraym ende van Manasses. ende sij baden den coninck dat hi haren tempel in Garisiem eere doen wilde Ende hi beloefdet hem te doen als hi weder om keeren soude ende sij baden hem dat

[fol. d2v]

hi hem den tribuyt vanden seuenden iare verliet Hi vraechde hem wye sij waren Sij seiden dat sij hebreeusche waren Die coninc vraechde of sij Ioden waren. doe seyden sy Neen Doe seide hem alexander dat hijt den ioden gegeuen hadde ende nyemant anders Want het was der samaritanen maniere. als sij sagen dattet den ioden wel ghinc soe seiden sij dat sij haer maghen waren maer alst den ioden qualic ghinc soe seiden sij dat sij hem niet en bestonden