Die hystorie dat leuen ende dat regiment des alre grootsten ende machtichsten conincx Alexander die heere ende prince was van alle die werelt

Hoe Alexander sijn rijck ontfinc Ca: ix

[A]Ls die coninc Philippus doot was. so ont finc alexander sijn zone altemael sijn rijcke Maer Alexander was quaeder ende vromer dan sijn vader was Sinte Augustinus bescrijft

[fol. b5r]

dat Alexander ende sijn vader altijt naerstelick stonden om die zeghe te winnen Mer alexander auentuerde hem seluen openbaerlick om die zeghe te crigen sonder verradenis: ende Philips die vader gaf hem node in die auenture. mer al slupende ende mit verradenis plach hi meer sijn vyanden te verwinnen Hier om was hi die wijste diemen vandt: mer alexander sijn zone was meerder van moede Philippus als hi toornich was. so bedecte hi dat als een wijs man. maer alexander en micte daer niet op. want als hi gram was soe en wasser gheen maete noch redene inne: Beyde droncken sij gherne wijn ende dicke waren sij droncken Maer haer dronckenscap was twederhande: want als Philippus droncken was so en achte hi niet hoe verre ende onueruaerliken dat hi liep onder sijn vyanden. Mer als alexander droncken was soe moestent sijn vrienden ontgelden Alexander wilde ontsyen wesen. mer sijn vader wilde gemint wesen: Philips was vol sorgen ende wel sprekende. ende alexander en brack nyemande trouwe Philips was ghenadich ende zeer goedertieren op die gheene die hi verwan: mer alexander was des veel te stouter ende te ouerdadigher Doe Philippus gestoruen was soe dede hem alexander eerlick ter aerden doen. ghelijck alst hem betaemde nae sijn conincklike werdicheit Doe dede alexander cleyn

[fol. b5v]

ende groot al ontbiden die hulp raet of daet tot Philippus sijns vaders doot gegeuen hadden: sonder alexander sinen broeder Ende dat was om dat hi hem gruetede ouer coninc dat eerste dat hi hem ghemoete Hi dede doden Mercenarus sijn broeder van sijns vaders weghen. om dat hi seide dat hem dat rijcke mit rechte toebehoorde