Die hystorie dat leuen ende dat regiment des alre grootsten ende machtichsten conincx Alexander die heere ende prince was van alle die werelt

Hoe Alexander Neptanabus dode Ca: v

[A]Ls Alexander xij. iaer out was soe wilde hi rijden mit sijnen vader: want hi minde doe zeer die wapen Ende doe begonste hi wapen te dragen: ende hi voer dicke int heer: ende daer hildt hi hem soe vromelic oft hi langhe ridderscap geplogen hadde. Ende hi bat Neptanabus dat hi hem wilde leeren in die sterren te syen: ende hi dedet gherne also dat hi verstandel daer in wort Ende Neptanabus leyde alexander op enen

[fol. a5r]

nacht op enen hoghen berch daer een diep dal onder lach. ende daer seyde Neptanabus veel wonders dat hi inder sterren sach Doe vraechde hem Alexander of hi daer inne wel sach wat dinghen datter geschien souden Neptanabus antwoorde hem Iae ic Doe nam hem Alexander ende stacken vanden berghe dat hi viel ende brack sinen hals Doe seide Alexander Waer om en voorsaecht ghi niet dat v dit ongeual geuallen soude Licht v nv opwaert ende besyet die sterren Neptanabus antwoorde hem ende seide Nyemant en mach ontulyen dat hem die goden gheset hebben te geschien. want ouer langhen tijt heb ic geweten ende nv weet ic bet dat mi mijn kint doden soude: Doe vraechde Alexander oft hi dan sijn vader was Neptanabus seide hem Iae ic ende hi belijede hoe hi sijn moeder bedrogen hadde ende hi seide hem al wat hi haer te verstaen hadde gegheuen. ende nae desen woorden eynde hi sijn leuen Doe nam hem Alexander op sinen hals wt vaderlicker minnen ende hi droech hem in die zale ende dede hem eerlick begrauen Ende als hijt sijnre moeder vertelde so hadde sy des groot wonder dat sy alsoe bedroghen was: ende sy seide haren zone alle dat gheene dat haer geboert ende gheschiet was Ende sy seyde hem alle dingen alsoe die geuallen waren: