Die hystorie dat leuen ende dat regiment des alre grootsten ende machtichsten conincx Alexander die heere ende prince was van alle die werelt

[fol. a1v]

[fol. a2r]

Hier beghint die Hystorie dat leuen ende dat regiment des alre grootsten ende machtichsten conincx Alexander Die heere ende prince was van alle die werelt Dat eerste cap:

[T]Ot deser tijt dat Othus Artaxarses zone regneerde in. Persen ende in Meden: ende hi in sijn tiende iaer was van sijnen rijcke. Ende int laetste iaer dat Philippus regneerde in. Macedonien Ende int laetste iaer dat Neptanabus crone ghedraghen hadde in Egipten Soe ghenas Olymphias van Alexander. alsoe men vinden mach in sinen gesten Maer veel lieden segghen dat die coninc Philippus Olymphias man Alexander an haer niet en wan: maer een ander man wan hem aen haer Want die coninc Othus van Persen doe hi Egipten wan soe verdreef hi Neptanabus den coninc vanden lande in deser manieren als wi scriuen sullen Want Neptanabus die coninc van Egipten hildt sijn lant mit touerien ende niet met striden Want als hi plach te vernemen datter eenich coninc of heer op hem quam om tegen hem ende in sijn lant te oerloghen: Soe ghinc hi alleen in een camere: ende daer dede hi mit groter toueryen ende nigromancien dat alle sijne vyanden scepen versoncken mit ten volcke in die zee ende verdroncken: Ende

[fol. a2v]

doe hi vernam dat die coninc Othus op hem quam mit een groot heer so loech Neptanabus daer om: want hi meende hem te doden als hi die ander ghedaen hadde Maer hi verstont vanden god daer hi sijn touerye mede doen wilde soe hi plach dat hi verwonnen soude bliuen ende geuangen worden. ten ware dat hi haestelic wt den lande vloghe Doe dede hi sijn haer ende sijnen baert of scheren: ende hi nam sijn beste iuweelen mit hem ende vloech te Macedonien waert: Ende daer wort hi vermaert voor een groot astronomijn ende Olymphias Philippus. vrouwe ontboet hem om raet an hem te nemen van saken die sy begheerde. want haer man die coninck Philippus was doe wten lande: