Die historie dat leven ende dat regiment des alre grootsten ende machtichsten coninc alexanders die heer was ende prince alle der werelt

¶ Hoe alexander voer tot amons tempel Ca xxiij

HIer nae voer alexander in lybien tot amons tempel, om dat hi kont ende kenlic doen woude dat hi van enen god ghewonnen was Ende om dat hi sijnre moeder suueren soude van haren dorperliken naem ende van hare ouerspul Alexander sende voer hem mit sinen boden grote presenten tot amons papen om dat die papen seggen souden dat alexander woude gheseit hebben Alexander quam seluer binnen den lande ende reet op dat sant inder zee, mer hi liet daer een deel luden die hem volghen wouden ende die verdroncken

[fol. c5v]

Mer alexander quam seluer ouer, ende quam ten tempel ghesont Ende die paep quam wt teghen hem, ende seide ouerluut dat iupiter sine vader was diemen daer int lant amon hiet Alsoe voerseit is soe reet darius lasteliken vten stride die hi verloes hier voer Ende hi quam int lant van babilonien, ende hi vernam dat alexander weder van ammons tempel ghekeert was weder in egipten Ende dat hi daer maken dede alexandrinen die hoefstat vanden lande Darius screef oetmoedeliken letteren an alexander dat hi hem beryede, ende sende hem weder sijn gheuanghen, ende namer alsoe veel gouts voer als hi woude Alexander eyschte ouer tghelt ende goet al sijn lant Darius screef weder tot alexander dat hi sijn oerlogen liet staen, ende naem sijn dochter te wiue, hi soude hem daer mede gheuen een groet deel van sinen rijc Alexander eyschte echter sijn rijc altemael, want het waer sijn, mer hi ontboet hem dat hi ende sijn volc oetmoedeliken wt quamen teghen hem, ende gauent hem op als of hijt al ghewonnen hadde