Die historie dat leven ende dat regiment des alre grootsten ende machtichsten coninc alexanders die heer was ende prince alle der werelt

¶ Hoe Alexander darius weder screef Capittel xv.

Dusdanighe letteren ende dese talen en bequamen die princen niet wel, ende si worden veruaert Ende alexander seide hem Ay ontsie di v van hogen woerden daer niet an en leyt, dit en is gheen wijsheit noch vroemheit mer tis die cleyne hondekijns manier, want soe si crancker sijn soe si meer grymmen Doe riep alexander ten boden wert die dese boetscap brochte voer alle sijn edel luden Ende hi gaf hem al dat ghelt dat si brochten ende hi gaf hem brieue die aldus spraken Ic alexander heer der coninghen ende den goeden maech ontbiet darius saluut, ende seit dattet hem aernstich is dat also groten coninc ende also groten heer als ghi v beroemt dat ghi sijt in swaren bedwanghe moet comen onder soe cleynen onwaerdigen volc als mit mi is, soe oec dat ghi mit alexander te dienste staen moet

[fol. b7r]

wat peynstu dattu ons screefste dattu soe rijc waerste van goude ende van suluer En weetstu niet dat alle ander ghemeenlic niet en begheren gout noch suluer Want hier om sellen wi te stouteliker op v striden ende te willichliker om di dat grote goet of te winnen onse sculde daer mede te betalen Dus heues mi oec gesent enen gesele ende enen bal ende gout mer ic uerstae dat dit een groet dinc bediet Die ghesel bediet dat ic di ende dine luden cortelic onder bedwanck hebben sel ende die bal bediet alle die werelt dat icker noch heer of wesen sel, dat gelt datttu mi sendes bediet dat al dijn goet cortelijc mijn wesen sel, dit seltu dus ondervinden