Die historie dat leven ende dat regiment des alre grootsten ende machtichsten coninc alexanders die heer was ende prince alle der werelt

¶ Hoe alexander sijn heer vergaderde Ca. xij.

NAe philips des conincs doot wort alexander ghecroent coninc in corinthen dat is die hoefstat van gryeken Ende doe vergaderde hi sijn heer ende hi wan die van ethenen ende thebeen Op enen nacht doe alexander op sijn bedde lach, ende pensede hoe hi azyen winnen mochte, soe quam god voer hem mit alle die ghewade verciert, die der ioden groten paep plech an te hebben in sinen dienst inden tempel Ende mit sijnre claerheit worde den nach inder sale lichter ende claerre dan den dach wesen mochte Ende hi sprac alexander aen ende seide dat hijs hem betrouwede Ende dat hi trecken soude ten ryke wert van oesten Want hi soude hem helpen dat hijt al winnen soude Ende doe hem alexander vraghede wie dat hi waer ende hoe dat hietede Soe seide hem die god, waer bi soe vraghestu

[fol. b4r]

na minen naem die seer wonderlic is, doet dat ic di segghe Ende dien mensche die ghi sien selt in dese ghelikenisse, doet hem eer Ende hier mede soe ontuoer hem god Tot dier tijt plech men ende oec daer te voren, dat elc mensche nae sijnre vader of oec sinen lieuen vrient dede maken een beelt als hi doot was, die properlijc ende hem wel ghelijc was Ende dit dede alexander doen Ende doe ghinc hi staende voer sijns vaders beelde ende seide tot sinen volke die hem ter wapen willen gheuen mit mi alexander die bereyde hem vast, want mi dencket nv tijt ende oec recht dat wi beginnen eerst te striden op die ghenen die ons hier voer tijts ghescadet hebben Ende die ons nv al onse vryheit nemen willen Alle die ridders ende dat edel volc warens alexanders toe in deser saken Ende alexander die ontdede doe sijns vaders scat, ende gaf soudye, gout ende suluer ende wapen alle die ghene die te doen hadden Ende hier mede vergaderde hi een groet heer onder orssen ende te voet tseuentich dusent ende seuen hondert ende vier hondert stoute mannen onder ionghelingen ende oude ende graeu Die voertijts mit hem ende mit sinen vader gheoerlocht hadden Want in alexanders heer

[fol. b4v]

en hadde nyemant voechdye noch heerscappye hi en was tseuentich iaer out Ende binnen alle sinen heer en peynsde nyemant om te vlien mer si penseden altoes om den seghe ende om verwinnen Ende hi nam sijn costemildelic wt sijns vaders scat ende dede veel scepen maken, ende daer mede voer hi te treten ende in lythaonien Ende dat lant toech hi mit vrienscap an hem, ende hier na wan hi cecilien Ende cort daer na voer hi doer dat lant van ytalyen, ende daer ontfenc hem die stat van romen eerlic ende wel Want si senden in sijn gemoet heymelic daer die stat van roemen alle an stont Ende dese brochten alexander een scoen duerbaer croen gemaect van finen goude ende ghesteente Ende dese croen gaf hi hem tot enen teyken ende tot enen ghedencken om dat die vrienscap van hem luden langhe dueren soude Alexander ontfenc dese crone harde gaerne Ende onthaelde emilnisse harde wel mit veel scoenre talen die hi wel conste Ende doe liet hi en vriendelic van hem sceyden Hier en bouen senden die romeynen alexander twee dusent mans ende viertich pont gheweghens gouts Dus voer alexander te effryken wert Ende hi doer reet sonder enighe weer

[fol. b5r]

mit alle sinen heer al lybien Ende hi quam aldus mit alle sinen volc in egipten mit scepen ende te lande Ende doe hi in egipten quam ontfinghen si hem eerlic ende wel ouer haren heer