Die historie dat leven ende dat regiment des alre grootsten ende machtichsten coninc alexanders die heer was ende prince alle der werelt

¶ Philips wraecte sijn manier Capit. xi.

PAnsames hadde ghewacht dat alexander lach in oerloghe mit groten heere Want alexander wort tot deser tijt soe vermaert van vromicheden datmen een deel ontsach Ende dese pansames quam op philips die coninc mit crafte ter wylen dat alexander wech was, ende hi wonde philips ter doot Ende hi nam hem mit crafte olymphias der conincinnen, mer die auontuer viel alsoe dat alexander te huus quam varen ter wijl dattet gheuecht was ende hi vinc dien pansames Ende hi vernam dat philips sijn vader noch leefde, ende men brochte pansames voer hem ende hi gaf hem seluer een bloet swaert in die hant ende hiete dat hi hem seluer wrake ouer sinen viant ende daer doot sloeghe Ende philips doer stac pansames doer sijn machte,

[fol. b1v]

dat hi doot bleef Ende doe philips begonde cranc te worden soe seide hi, mi en is niet leet dat ic steruen sel want hi is doot die mi gheslaghen heeft Want lieue soen alexander ic pensede nv om die woerden die mi v moeder seide doese v droech Ic hebbe begeert enen wreker ende mit dese woerden starf philips ende gaf sinen geest Die coninc philips conde veel van wapenen ende ridderscap, ende hi was een goet ende vroet oerloghes man ende hi was tot allen tiden bewaert van wapenen ende van scatte om weder te staen wes hi te doen hadde Hi was oec altoes op sijn hoede ende nemmer meer en wert hi moede roeuens, als nv was hi ontfermich, ende als nv loes, ende ten dochte hem gheen misdaet al hate hi enen man altoes noch hoe hien verwinnen mochte was stille of lude of mit logenen, hi was goedertieren ende moertdadich, ende hi beloefde meer dan hi dede hi was vrient daert hem vroemen mochte want anders en mochte nyemant an hem comen Hi toende vrienscap den ghenen die hatede ende die vriende waren maecte hi tonvriende ende dede striden Ende dan conste hi wel hem an beyden siden ghelaten vriendelic om vordel daer an te weruen Hi was behendich vroet

[fol. b2r]

ende scalc in sijnre talen Palerina scrijft oec van philips dat hi eenwerf ontboden was dat alexander sijn soen vrienscap beiaghen woude an enighen luden mit ghelde Ende doe screef hi an hem, alexander lieue soen, waer hebstu dat gheleert dattu vrienden mit ghelt copen wilste daer gheen trouwe an wesen mach Want die vrienden diemen mit ghelt coept wanneer hem niet meer en ghift soe is die vrienscap al gheleden Hi scrijft oec hoe appollijn philips ontboet een teyken sijnre doot aldus want hi hieten hem wachten vanden waghen Ende hier om brac die coninc philips alle die waghenen van sinen lande ende dede karren daer voer maken mer appollijn meende die waghen die in pansames swaert ghescreuen stont tenen teyken daer philips mede verslaghen was Philips die coninc van macedonien, riet alexander sinen soen dat hi mit scoenen goeden woerden soude te vriende houden die ghemeente Ende dat hise vriendelic toe spreken soude als hise ghemoete Ende voert als hi die ridders ontmoete dat hise helsen ende cussen soude ende ten eten mit hem leyden soude Orosius scriuet dat philips die coninc des daghes te voren eer hi gheslaghen

[fol. b2v]

was gheuraecht wert, wat doot hi alre liefste te steruen hadde Ende hi antwoerde dit ende seide, ic prise datmen enen groten heer na veel seghes ende eren die hi gewonnen heeft datmen sonder verradenisse ende sonder vrese verslae als hi sit in paeyse ende in vreden ende in groter eren, ende dat hi dan sterue sonder siecheit ende sonder euel Dit selue ghesciede hem Ende die gode en mochtent niet beletten al hadde hi hem luttel eren ghedaen, want al had hi oeyt haren tempel ende haer outaer beroeft, nochtan en mochtent sijs niet beletten hi en starf also als si begheerde Nochtan plech hi haer beelde sticken te breken om die ghiericheit vanden goude daer si of ghemaect waren