Die historie dat leven ende dat regiment des alre grootsten ende machtichsten coninc alexanders die heer was ende prince alle der werelt

¶ Hoe alexander neptunabus dode Ca. v.

ALs alexander twalef iaer out was so woude hi riden mit sinen vader, want hi minde doe seer wapen, ende doe begonde hi wapen te draghen, ende hi voer dicke int heer ende daer hielt hi hem so vromelic als of hi langhe ridderscap gheplogen hadde Ende hi bat neptanabus dat hi hem woude leren inder sterren te sien ende hi dedet gaerne, also dat hi verstandel daer in wort Ende neptanabus leide alexander op enen nach op enen hogen berghe daer een diep dal onder lach Ende daer seide neptanabus veel wonders dat hi inder sterren sach Ende doe vraechde hem alexander of hi daer wel sach watter ghescien soude Ende doe seide neptanabus iae ic Doe nam hem alexander ende stacken neder vanden berghe dat hi viel ende brac sinen hals Doe seide alexander, waer om en voersachstu niet dattu dit ghescien soude, licht di nv opwert

[fol. a4v]

ende besich die sterren Ende neptanabus antwoerde hem doe ende seide Ay mi nyemant en mach ontulien dat hem die goden gheset hebben te gheschien, want ouerlanc heb icket geweten mer nv weet ic bet dat mi mijn kint doden soude Doe vraechde hem alexander of hi dan waer sijn vader Ende daer beliede doe neptanabus hoe hi sijnre moeder ghehoent hadde ende seide al wat hi haer gaf te verstaen Ende mit dese woerden eynde hi sijn leuen Ende doe nammen alexander op sinen hals van vaderliker minnen ende droech hem inder salen ende deden eerlic begrauen Ende doe hijt sijnre moeder vertelde soe hadde si groet wonder dat si aldus bedroghen was, ende si seidet haren soen alle dat haer gheuallen was Ende dat alle die saken alsoe gheuielen