sten keisers Fredericx sone was, daer aen wan Henric een sone die ooc Henric heet, ende .iiij. dochteren Deerste heet Machtelt ende was te huwelic gheghe[uen] des conincx van Vrancrijck broeder ende was graue van Artoys ende Simpoel. Daer af quam de vrome Robrecht van Artoys. Die ander dochter heet Marie ende die hadde te wiue de hertoge van Beyeren. Die derde heet Beatris ende die had die lantgraue van Doringen Die vierde heete Margriete ende bleeff maget die werelt begeuende ende wert nonne in sinte Bernaerts orden in de abdije van shertogen dale, die haer vader die tweede hertoge Henrick stichte, daer toe besettende die grote thienden van ouer Yssche met anderen goeden, ende namaels wert daer de selue Margriete abdisse. Als de eerste huisurouwe van hertoge Henrick ouerleden was so troude hi een ander edel bloeme Sophie sinte Lijsbetten van Doringen dochter die seer duechdelic, gode vresende ende ontfermhertich was. Ende nauolgende dat exempel van hairder moeder so plachse geerne te visiteren ende te troosten die arme siecken daer sijse wiste, ende gaf veel aelmissen haer leuen voort regulerende na dye wercken die si in haer moeder ghemerct hadde Dese goede Sophie hadde van hertoghe Henrick eenen sone die ooc Henrick heet ende die werdt namaels lantgraue van Doringen. Dese voorseyde hertoghe Henrick hadde in sijnre tijt grote oorloge tusschen den Rijn ende die Mase, want hi wan Randenrode ende destrueerdet inden gront. Daer na belach hi Colen met grooter machte ende street tegen die van binnen ende wat buten der stat stont dat destrueerde hi. Ende want Colen niet te crigen en was so track hi tot Bonne in die wijngaerde die hi verderuen dede ende hi doorreet alle tlant so dat hem niemant wederstaen en dorste. Mer als hi noch voor Colen lach so gheuielt dat sijn sommiers die totten heyre waert quamen met visschen die si voerden so leden si voor bi dat casteele van Daelhem dat nv den hertoge toe behoort Doe quamen die kinder des heren van Daelhem ende roofden die visschen mit ghewelde ende deden ouerlast des hertogen dienaren twelc si namaels beclaechden. Die hertoghe dit horende soe wert hi beroert ende hi swoer dat hi dat wreken soude eer hi in Brabant weder keerde. So quam die hertoghe Heynrick ende beleyde Daelhem, twelck hi creech met al sijn toe behoorten, daer Brabant seer mede ghesterct was van dier sijden.
¶ Jn dees hertogen tijde was die heylige kercke verlicht van groten leraers als sinte Thomas van aquinen ende Albertus magnus beyde vanden predicaren ordene. Ende sinte Bonauentura ende Alexander de Hales vander minre broeder ordenen ende meer ander
¶ Jck keer weder op hertoge Henric den grootmoedigen denwelcken die vierde paus Jnnocentius grote eer bewees hem presenterende dat keyserijck want keyser Frederic die tweede was af geset om sijnre tyrantscap wille ende sterff namaels haestelic, want hi wert van sijnen sone vermoort, gelijc hi daer te voren sinen anderen sone selue verworget hadde, aldus geschiede hem also hi selue gedaen hadde. Mer als Frederick noch leefde so was de seste Henric totten keiserijcke gecoren geweest die niet en mochte Frederick verwinnen. Na
Auteursrechtelijk beschermd
