dewijns van Henegouwen dochter dye die selue coninc Philips getrout hadt die vanden rechten gheslachte vanden groten coninc Karel was ouermits Ermgaert haer oude moeder dye des voorscreuen hertogen Karels die te Orliens sterff dochter was, also corts hier voor gheseyt is
Dese voorscreuen veranderinge ende vervreemdinge der cronen van vrancrijcke heeft den menigen groot verwonderinge gemaect. Maer nochtans so en is dat so groten wonder niet als wi aenmercken willen daer die heylighe scriftuer seyt Wi is die dair bekennende is den sinne des heren, of wie heeft sijn raetsman geweest. Oft hi seggen wilde, niemant. wiens ordelen diepe ende ongrondelijc sijn Jn wiens handen sijn alle conincrijcken vander aerden die dat rijcke ouerstelt van deen volck tot op dander ouermits bedroch ende onrecht dat inden menschen is. etcetera.
Jn somige boecken van ouden croniken oft historien so vintmen bescreuen dat die voorscreuen Huyge Capet daer te voren bi nachte een verthoninge had van sinte Walericus die hem van gods wegen bootschapte, dat hi ende sijn nacomelingen tot eewigen tijden die crone van vrancrijcke besitten souden, mits dien dat die selue Huge sijn reliquien ende van sinte Richerius weder had gebracht op haer plaetsen, na datse wt wesen vanden ongelouigen Noormannen ende Denen elders getransporteert hadden doe si alle tlandt bedoruen, also voorseyt is
Jtem om noch meer hier af te weten als vander veranderingen van deser crone van Vrancrijcke. So is te weten al waert dat dese voorscreuen reuelatie van gheenre waerden en waer ende datmen die voor fantasije hielde, ende dat Huge tonrechte die Fransche crone aen geueert hadde So en soude dair nochtan niet wel wt volghen dat die goede coninc Robertus sijn sone (die welc een duechdelic man was) ende sijn nacomelingen daer so veel heylige coningen af ghecomen sijn dat si die crone te onrechte beseten hadden die so vierichlijc in heylicheyt hebben geleeft dat wonder is, vromelic dat ongelouich volck beuechtende. etc.
Ooc so is te weten dat na der doot vanden hertoge Otto van Brabant, die welcke was des voorseyden hertoghen Karels soone, so en was gheen manlick oor meer van coninck karels geslachte Ende want bider wet gheheten Lex salica, ende ooc bi ouder gewoonten ouer .M. iaren in Vrancrijcke onderhouden dat de crone op geen vrouwen en versterft So wast gheoorloft den princen metten volcke des rijcx yemant coninc te kiesen. Ooc is te vermoeden dat also bi gods wille geschiet is van deser derder generatien of genealogien van coninc Hugo, want die ander twee voorgaende generatien, te weten van coninc Clodoueus eerst kersten, ende van Pippijn des groten Karels vader hebben gehadt gloriose ende eerlike beginselen mer sobere ende deerlike eynden, maer dese derde genealogie oft linie ter contrarien heeft gehadt een snode oft sober beghin ende een loofliken ende gloriose voortganc so dat blijct in veel duechdelijke ende victotriose coningen van deser
Auteursrechtelijk beschermd
