Van Brabant die excellente cronike

Dat .xxij. capitel. Hoe vrancrijcke gregeert wert na coninc Lodewijcx doot die lispere Ende van Kaerlen die simpele sinen sone

 

 

 

 

NA de doot vanden voorscreuen keyser Kaerle die des lispenden conincx lodewijcx ooms sone was aenmerckende die Fransoysen dat haer coninc Karel noch een kint was so aen namen si Odone graue Robrechts sone van Angouwe, welcke Robrecht met Ranulphus den hertoghe van Aquytanien vanden Noormannen inden strijde verslagen was also hier voren gheseyt is Dese Odo was .ix. iaren coninc Doen namen die edele van Vrancrijcke haren rechten heere den voorseyden Kaerle die simpele ende voerden hem met groter machte tot Ryemen, daer hy omtrent den iare .ix.C. coninc ghewijdt wert vanden bisscop van Riemen

 

Daer na quamen dye Noormannen Parijs beleggen Ende van daer trocken si op die stadt van Sens bi Bourgondien Ende als si die ooc niet crigen en consten so trocken si tot Tours in Torayne ende si verbranden die stadt ende destrueerden tlant veele quaets doende Die prince van desen Noormannen ende Denen was Rollo van edelen geslachte wt Denemercken die vanden coninc van Denemercken wten lande gebannen was so waren hem vele Denen ende noorwegers geuolcht Ende hi had met hem sinen neue Gello, die aldus voortgaende altijt in quaden daden, so quamen si beleggen die stadt van Chartres. Ende daer in waren

[fol. 93r]

 

Rijchaert die naemaels hertoge van Bourgondien wert, ende Robrecht van Parijs. Dese aenmerckende datse die Noormannen niet en conden wederstaen so namen si onser lieuer vrouwen hemde ende stelden dat als een banier op die mueren vander stadt Twelck siende die ongelouige so bespotten sijt ende si schoten daer na, mer haer ogen werden so verdonckert dat sijt niet en conden aen sien Ende dit siende die geen die int stat waren so quamen si ter stont wt ende veriaechden die Noormannen

 

Na dien dat die Denen ende Noormannen .xl. iaer lanck Vrancrijcke ende ander landen daer omtrent ghetribuleert hadden, so dede god sijn ontfermherticheit Want den noormannen begondet te verdrieten ende waren tot pays geneycht, gelouende ooc tkersten geloue aen te nemen. Als dit Karel de simpele vernam so was hi verblijt, ende tot vasticheit van dien so gaf hi den voorscreuen Rollo sijn dochter tot eenen wiue die Gilla hete Ende Rollo die wert kersten ende gedopet ende wert Robertus geheten na Robert graue van Parijs dyen hi vander vonten hief Ende hem wert gegeuen tlant geheten Neustria, dat na die Noorwegers oft Noormannen wert gheheten Normandien ende noch heet also. Dese Robertus wan eenen sone gheheten Willem die goet ende eerbaer was. Willem had een sone geheten richaert. Dese Richaert had twee sonen, deen heete richaert, dander Robrecht viscaert, welke Robrecht so vrome was dat hi naemaels creech Cecilien Poelgien Calabrien, ende hi verwan den Venechianen in stride ende ooc Alexis den keyser van griecken oft Constantinopolen Ende sijn bastaert sone was hertoge Willem van Normandien die Engelant vercreech, daer die coningen van Enghelant af comen sijn Ende eenen anderen sone had die voorscreuen Robrecht geheten Boemundus, die was mit hertoge Godefroyt van Billoen int heilich lant Ende doen Anthiochien gewonnen was so was hi daer heere af ghemaect

 

Gello die neue des voorseiden Rollo wert ooc kersten ende Kaerle die coninc gaf hem die borch van Bloys met haren behoorten, ende hi maecte daer een stat. Ende omtrent dier tijt int iaer .ix.C. ende xiij. begonste die oorde van Cluyngny

 

Jtem doe leefde in Brabant sinte wybert ende fondeerde dat clooster van Gemelours in walsch Brabant, daer hy in leyde een heylich leuen

 

Als die plage der Noormannen gecesseert was ende Kaerle die simpele coninc ende hertoge van Lothrijc oft Brabant in vreden meende te leuen, so quam Robert die graue van Parijs die een listich man was ende stont op tegen Karle seggende dat de cronce van vrancrike hem toebehoorde, om dat Odo graue van Angouwen sijn broeder voor genoemt die crone hadde ende regneerde Doe karel dat verstont so creech hi hulpe ende qaum tegen den vooscreuen Robert te stride bi der stadt van Soyson dair seer gestreden wert, ende Robert werde daer verslagen ende vele met hem. Niet te min Kaerle dair na ontsiende Roberts geslachte (twelc machtich was) maecte vrientscap ende alyance met coninc Henrick van Sassen Ende tot een teeken ende sekerheit seynde hi hem die hant vanden weerdigen martelaer sinte Dyonijs in goude beslagen ende verciert mit costlike ghesteenten

 

Daer na viel dese Kaerle de simpele

[fol. 93v]

 

in groot liden bi valsheden ende verraetscap die hem gedaen wert Want Heribert die graue van Vermendoys die des voorscreuen Roberts van Parijs die bi Soysson verslaghen was, suster ghetrout hadde, siende dat dye coninc te Vermendoys wert quam so ghinc hi ootmoedelic tot hem als een heimelic verrader presenterende sijnen dienste ende node hem ter maeltijt Die coninc hem gelouende ende sijn lagen niet voorsiende ginc met Heribert, dien verradelic vinc ende in die borch te Perone so leide hi den coninc geuangen, daer hi van veel drucx ende lijdens martelaer sterff, also die croniken seggen, na dat hi omtrent xxv. iaren geregneert hadde. Die coninginne van Vrancrijke sijn gesellinne dat vernemende nam Lodewijc haren sone die een ionck kint was ende si vloode wt Vrancrijcke tot coninc Eduwaert van Engelant haren vader

 

Van desen karel sijn dese veersen

Hic rex francorum fuit et dux lothariorum
Perone vinctus et ibidem martirisatus.