Van Brabant die excellente cronike

Dat .xxviij. capitel. Van sinte Jden Godeuaerts van Billyoens moeder

HEt was een edel ionge maget van seer edel geslachte geheeten Jde Haer vader heet Godefroot hertoge van Lothrijcke ende hertoge godefroot mitten bulte was haer broeder ende haer moeder heet Doda. Dese eedel maget Jde nam tot eenre manne Eustachius graue van Bolonien of bonen, ende hi creech van hair .iij. sonen, te weten, Godefroot, Boudewijn ende Eustachius De welke godefroot ende Boudewijn geboren waren tot Basiw bi Genapen daer si geerne was. Ende haer moeder soechdese met haren borsten Ende haren man behaechde wel haer duechdelic leuen ende lietse in harer vriheit gode dienen. Doe begonste si die arme te besorgen, kercken te stichten, ende tot volcomenheyt van allen goeden wercken haer te gheuen So gebuerdet dat die graue Eustachius hair man sterf, ende doe keerdese weder tot haren ouders. Doe quam si in een kercke in die eere van sinte wal

[fol. 29v]

burgis gewijet om te beden So was daer een wijf die watersuchtich was ende die niet gaen en conde, die sint Jde met haren handen ophief vander aerden ende maectese gesont met haren gebede.

Als die eerweerdige abt Huge van cluygny hier int lant quam so bad hem sinte Jde dat hi enige broeders van sijnre ordenen senden wilde ter plaetsen geheten te Wast, biddende dat hise metten broeders eruen wilde geestelic Als die abt dit hoorde so voldede hi hair begeerte

Op een tijt quam een arm crepel man sinte Jde te gemoete biddende om aelmoesene Ende als si haer hant wt reycte so wert hi ghenesen

Jtem op een tijt als sinte Jde inder nacht was inder kercken dair die moniken den dienst deden, so quam tot haer een wijf hebbende een dochter die doue ende stom was, die welc van sint Jde gesont gemaect wert ter beden vander moeder. Ende dit meisken viel daer na in oncuysheit ende baerde een kint, mits welcker misdaet si verbuerde de prouene die sinte Jde hair vanden abt vercregen had. Mer ter beden van sint Jden vercreechse weder ontfermherticheit ende gesontheit Daer na anderwerf ende derdewerf creech si weder kinder ende viel weder inder seluer siecten. Ende sinte Jde dede haer weder goedertierenheyt voor haer biddende datse gesont wert Daer na leefde si in reynicheyt totten eynde haers leuens

Als dan sinte Jde haer teeder lichame lange met vastene, wakene, ende ander heylige wercken gecastijt had so wertse sieck der doot nakende Twelc vernemende die van Wast waren seer droeuich Ende opten .xiij. nacht van April ter middernacht verschietse vander werelt ende reysde tot gode Ende met veel tranen wert haer lichaem vanden broederen aldaer begrauen eerweerdichlijck

Dese plaetse hadse vercoren in haer leuen ende na haer doot vercierde sijse met schone miraculen, want veele siecken op haer graf biddende werden gesont Ende na lange tiden wert haer lichame vonden al heel ongequetst

Jtem op haer graff wert een beseten mensche vanden viant verlost Ende haers soons dochter coortsich sijnde wert op tgraf ooc verlost

Desgelijcx een deuoot monic die sere sieck was vander cortsen ende hi plach sinte Jden als si noch leefde gedienstich te sijn, die wert ooc van haer ghenesen bider gratien gods. Noch veel meer ander miraculen geschieden door hare die hier te lanck te vertellen waren