Van Brabant die excellente cronike

Dat .xxi. capitel. Van sinte Wybert van Gemelours.

SJnte Guybertus, dat is Wybeert was een edel ridder, here van Gemmelours in walsch Brabant. Sijn vader heet Lyotoldus, ende sijn oude vader heer Rondingus die seer god vruchtich was want als hi lange gode ghedient had onder den mantel der werltliker blijscapen, so gaf hi sijn goet van Gemelours ouer en stichte daer een clooster ter eren van sinte Peeter prince der apostolen dair een schare van monicken dienden gode nacht ende dach Ende bi rade der broederen so maecte hi daer abt den eerweerdigen man Herluynus wten cloostere van Gorsie ghenomen.

Daer na was sinte Wibert ooc grote begeerte crigende totter heyliger ordenen, want hem en docht niet ghenoech te sijn dat hi sijn goet gelaten hadde hi en moste ooc sijn cruce na onsen here dragen ende hem na volgen Mer want hem dochte datmen hem te Gemelours int nieuwe clooster bi auontuer eenighe eer oft vordeel doen soude so vercoos hi gode te dienen int voorseide cloostere van Gorsie, daer hi ontfangen was vanden deuoten abt Agmoldus ende leefde daer seer heylichlic. Ende die fondacie vander voorseyder abdyen van Gemelours die wert vanden keyser geconfirmeert ende vry gemaect van allen tolle ende tribuyte in alle plaetzen, met machte ooc gelt te munten. etcetera. Jnsgelijcx wert dit clooster geconfirmeert ende gepriuilegieert vanden paus Benedictus die .vij. ende alleen gestelt onder de iurisdictie des stoels van Rome ende dat die abt eenen mijter ghebruycken mach

[fol. 22v]

Dese heylige man Guibertus predicte ooc twoort gods sonderlinge inder tijt vanden eersten keyser Otto als die Hongeren in Lothrike veel quaets deden ontrent Gemmelours soe dat hi de sommige bekeerde van haren ongeloue. Daer na beual hi den broederen te gode ende keerde weder tot sijnder enicheyt int clooster te Gorsye Ende als den tijt quam dat god hem vander werelt wilde roepen so wert hi quelende. Twelc de goede lieden van Gemmelours vernamen dat haer vader ende here cranck was beduchtende dat si hem verliesen souden So reysden si tot hem oetmoedelic biddende dat si sijn lichaem naer sijn doot mochten vueren tot Gemmelours.

Die abt antwoorde goedertierlic Waert den wille gods ende die lieden van Gemmelours dies macht hadden, het waer wel sijnen wille Daer na so sterf sinte wybeert vol duechden opten .xxij. dach in Junio int iaer ons heeren .ix.C.lxij. ende ontfinc die crone der glorien.

Doe namen die van Gemmelours sijn lichaem ende leyden dat op een wagen. Ende als si opten wege waren so quam dat volc van Gorsyen met macht hem na geuolcht om dat heylich lichaem hem te nemen om selue te houdene. Maer god quam die van Gemmelours te hulpe. want daer stont op een tempeeste inder lucht van donre blixem ende regen ende so duyster wert die dach oft nacht hadt geweest, nochtan geraecten si den rechten wech, mer die van Gorsie verdoolden wten weghe ende waren beschaemt. Aldus wert sinte wybertus te Gemmelours gebracht met groter werdicheit ende blijscape des volcx ende wert begrauen in die kercke sinte Saluatoers ende sinte Peters

Lange daer na ouermits die grote mirakelen die bi sinte wybeert gescieden so dachten die abt ende moniken hem doen verheffen int iaer ons heeren .M.xcix. inder tijt als leefde die eerwerdige ende grote meester Sigibertus historiographus aldair religioes, die dair grote neersticheit toe dede dat sint wybert verheuen wert. Daer veel teekenen doe geschieden inden hemel ende inder aerden, die om cortheyt wil hier achter ghelaten werden