Van Brabant die excellente cronike

Dat .ix. capitel. Vander heiliger maget sinte Berlindis.

INden tijden van Dagobertus coninc van Vrancrijcke so was een machtich man geheten Odelart here van Meerbeke bi Nyenouen ende hi diende onder Wytgherus sinte Goedelen vader daer voor af gheseyt is. Dese Odelardus hadde tot eenre huysurouwen die

[fol. 11v]

suster van sinte Amant ende heet Nonna Ende van haer creech hi sinte Berlindis die heylighe maget Die moeder sterf na .xij. iaren ende so bleef Odelaert mit sijn dochter gode dienende mit aelmissen ende goede wercken. Ende lange daer na so wert Odelaert gheslagen met lazarijen bi gods ghehengenisse Ende lange quelende so werden sijn dienairs verdrietich ende lieten hem so dat hi op een tijt met sijnre dochter alleen was ende eyschte van haer wat te drincken Ende si stont op ende spuelde den cop ende gaf haren vader te drincken, dien gedroncken hebbende den nap haer weder gaf So wert si ooc dorst hebbende maer die viant tempteerdese so dat si na haren vader niet drincken en wilde mer storte den nap ende spuelden weder ende soe dranck si daer wte Twelck merckende haer vader soe sweech hy ende met gestoerden moede beual hi dat men een waghen ghereyde So voer hi tot Nyuele daer sinte Gheertruyt ruste, ende hi gaf hair daer ouer alle sijn erue met eenen russche ende rijse ende een messe hebbende eenen witten hecht dye hi mede bracht om haer te gheuen ende om sijn dochter also van haer vaderlijc ende moederlic erue te berouen Ende doe geschiede daer een wonderlijc teeken tot gods geloue. Want doen Odelaert quam voor tlichaem van sinte Gheertruyt soe seyde hi dat hi haer sijn erue nemmermeer geuen en soude, ten waer dat sise met haer eygen hant ontfinge. Ende riep tot haer vierwerf Heylighe Geertruyt ontfaet dese gifte van mijnder hant, ende en wilt mi arme sondaer voor v wenende niet versmaden. Doe ghinc die feretre oft casse open daer si in ruste ende daert al tvolck sach so stack sinte Gheertruyt haer hant wt ende ontfinc daer in den voorseyden russch metten rijse ende messe van Odelaerts handen ende doe ghinc de feretre toe als vore

Die maghet Berlindis dat siende datse hairs goets berooft was so was si dair in verduldich ende met alre herten wert si versmadende alle wereltlicke dingen, welluste van spijsen ende costelike clederen, ende si droech eenen haren cleet op haer lichaem Ende met vasten, ghebeden ende heylighe wakinge so creech si die gracie des hemelschen brudegoms Ende int clooster van onser lieuer vrouwen tot Moerssele werde si ghewijlt ende leefde daer in groter heylicheyt.

Op een tijt alsmen daer te mettene luyde te middernacht so hoorde si die stemme der engelen die hairs vaders siele ten hemel vuerden met sange. Ende so nam si oorlof vander moeder des cloosters om haren vader te begrauen ende ghinc tot Meerbeke, ende si begroef daer haren vader eerliken bi haerder moeder in onser lieuer vrouwen kercke die welck si selue daer ghetimmert had. Ende want dat clooster voorseit te Moersele vanden Huynen verbrant was ende al verdoruen, ende so arme datter nauwe ses maechden broots genoech en hadden So bleef si voort an gode dienende te Meerbeke inder kercken nacht ende dach Ende seer nerstelick visiteerde si die siecken ende versach die arme gode altijt louende. Altijt so droech si een haren cleet ende een steene hadde si onder haer hooft als si ruste. Gheen vleesch en adt si, broot ende water was alleen haer spijse wtgenomen op grote hoochtiden Alsulcken gracie

[fol. 12r]

gaf haer god dat si alrehande siecken ghenas met ghenaken haerder hant Jn deser stranghicheyt des leuens so bleef sinte Berlindis .xv. iaren na hair vaders doot. Ende eens opten heyligen paeschdach so wert voor haer op dye tafel geset een cleyn stuck visch, twelc bi gods wille verkeerde in vleesch ende daer af nutte si een weynich, ende si leefde .xvij. iaren na haren vader.

Als si dan bi godlicker openbaringen verstont dat die doot haer was nakende so begeerde si haer heylich olye ende si ontfinc dat heylich lichaem ons heren ende gaf haren geest in gods handen opten derden dach van Sporkille. Doen quamen haer vrienden ende magen ende die meeste vanden lande ende begroeuense seer weerdichlic.

Die tekenen ende miraculen die godt door haer dair gewracht heuet en soude niemant connen wt spreken. Veel blinde sijn daer siende gheworden, vele croepele, veel doue ende stomme werden daer ooc ghenesen Ende die beseten waren vanden vyant werden op haer graf verlost. Na .vij. iaren so dachten die goede lieden haer graf te verbeteren. Ende als si die dootkiste die van houte was waenden op te heffen soe vonden sise steenen bi godliker miraculen, dies si hoochliken gode loefden. Mer daer was een wijf die seyde dat ghelogen was Ende comende om te besien dat graf, so wert si becommert metten bosen viant neder vallende ter aerden Ende vier dagen bleef si daer leggende oft si doot hadde geweest tot dat sinte Berlindis biden gebede des volcx aenroepende haer maecte ghesont Door welcken mirakel alle tlant beruert wert ende tvolck quam daer met groter menichten ende timmerden die kercke daer nv sinte Berlindis rustet

Daer na int .xxx. iaer haers verscheydens so wert alle tlant weder beruert om dese heylighe maget te verheffen So dat daer quamen twee bisscopen van Camerijck ende van Doornijke die verhieuen die heylighe maghet ende leyden haer heylich lichaem in die feretre daert nv in leyt tot Meerbeke Ende haer nichten sinte Celsa ende sinte Nonna leggen daer bi haer Grote tekenen gheschieden daer, die welke hier achter bliuen om der lancheyt wille

O edel Brabant, met rechte moechdi wel salich heten daer so veel duechdelicke planten in ghegroyet sijn ende haer leuen so heylichliken hebben gheleyt.