Een Aemstelredams amoureus lietboeck

Een Liedeken, Op de wijse: alst begint

VVt liefden ziet // Lijdt ick verdriet,
Ick en macht oock niet, wtspreken,
Hoe dat sy hiet // Die t'harte doorschiet
Twelck Venus heeft ontsteken
Noyt smert so groot // In desen noot
Wie soude den cloot gheraken
Reyn roosken root // Troost my tis noot
Eer ick den doot moet smaecken.

Ick ben deurwont // Sijt dies oorcont
In t'shartzen gront met lijden,
Nochtans haer mont // Haer borstkens ront
Can mijn terstont verblijden,
In t'swerelts croon // Door haren thoon,
Spant sy den croon van Vrouwen
In desen hoon // Haer dienaers loon
Wie sou die schoon betrouwen.

Liefs woorden soet, Voor gelt voor goet
Want lief by lief moet blijuen
Noch vintmen goet // Dat troosten doet,
Twelck liefde doet verdrijuen
Maer dees Kerssou // Daer ick op bou,
Is by gheen Vrou te ghelijcken
Verdrijf ick den dou // Ic sterue van rou,
Schoon Liefken trou moet blijcken.

Laet hope mijn trooster zijn,
Schoon Roosemareyn ghepresen,
Gheeft Medecijn // Eer ick verdwijn,
So is mijn pijn ghenesen
Maer weyghert zijt // Gheen meerder spijt,
Mijn Hart dat splijt door deruen
Vermaledijt // Sy ure oft tijt,
Ick roep ick crijt om steruen

Ist haer behaecht, Eer ghy loff draecht

[p. 159]

 

Haer zy bevraecht met smeecken,

 

Ick hebt gewaecht // Tsy Godt geclaecht

 

Dus hoort die Maecht eerst spreken,

 

Loopt niet verblint // Al teghen die wint

 

Oock niet en mint met ooghen,

 

Maer wel versint // Eer dat ghy mint

 

Eer ghy v vint bedroghen.

 

 

 

Met oorloff reyn, Siet int ghemeyn

 

Ick blijff alleyn in smerte,

 

Ick prijs dat greyn // In swerelts pleyn,

 

Sy blijft alleyn int Harte

 

Sy is eerbaer, haer oochskens claer

 

Al sonder maer gheschepen,

 

Een ure van haer // Is duysent Jaer

 

t'Block valt te swaer te slepen.