Een Aemstelredams amoureus lietboeck

Op de wijse: V liefde quelt mi totter doot.

Men placht eertijt doort loopen snel,
Doort dansen, en lustich springen
Doort dienen, swemmen, doort praeten soet gerel
Doort fray en lieflic singen,
Een moy meysken te bedingen

Athalanta wert doort loopen ras
Ghewonnen sonder claghen
Doort praten, singen // Doort dansen op dit pas
Crijcht menich zijn behaghen
Tverdriet mijn noch niet te iagen

Leander heeft om Hero dick
Door Zee geswommen vaerdich
Verwondert v dat een parsoon als ick
Namelijc plomp onaerdich
Om v lief gae dolen waerdich

Mocht ick als Iacob v persoon
Rachel verdiende winnen
Geen diensten swaer // souden mijn om dit loon
Sijn tegen mijnen sinnen
Want v sal ic eewich minnen.

V wesen schoon mijn hart behaecht
V reden cloeck doet hoopen
Ghy sult mijn schincken daer ic om heb geiaecht
Daer ick noch moet om loopen,
Want v trou can ick niet coopen

Veel gauen zijn in v ghelijck
Pallas verstant en reden
Ghi hebt veel Junoos schatten, mer venus suyerlijc
Heeft om so schone leden
Voor Adone dick ghebeden

Dat haer behaecht heeft mijn verstant,
Oock seer gequest ootmoedich
Bid ick Princesse doet v dienaer bystant
Toont nv v herte goedich
En vertroost v dienaer spoedich.

Als ghy beproeft hebt eenen vrient
Die v in rechte trouwe dient
Dient hem wederom met trouwen
En laet v gheen arbeyt rouwen.