Borgerliicke Huyshouding

Derde Handelingh. Derde wtkomst.

Moeder des Huysghesins. Roel.

Moeder

Roel, hebt ghy onse Meyt hier ontrent niet vernomen?
Ick hebb’ haer soo van doen: ’k weet haer niet te bekomen.
Mijn Outste zoon die komt daer thuys uyt Enghelant:
Ick wenschste, dat sy twerck wat dede aen deen kant.

Roel.

Begheert gy Vrouw dat ick na haer eens om ga vraghen?
Misschien sy hier of daer wat heen mach sijn gaen draghen.

Moeder

Ia, loopt vry Roel, en looft u voeten een paer schoen:
En als ghy haer dan hebt, seght dat sy haer wilt spoen:
Want ick heb niet ghekoockt: tis alles van sijn stede:
Indien ’t mijn man oock wist hy waer niet wel te vrede.
En soo ghy haer niet en kunt vinden hier of daer
Soo haest u dan vry wat, comt ghy in plaets van haer.