Borgerliicke Huyshouding

[fol.  A3r]

Lof-dicht, Ter Eeren den VVaert-geroemden, ende Gonst-rijcken Lucas Zasij; Rectoor inde vermaerde Schole tot Woerden.

O Zasij wel te recht zijt ghy waerdigh gepresen
Door dien ghy uyt het breyn uwes hoofts ons te lesen
(Hier geeft in dit u werck) hoe dat een Vader sal
Zijn kinderen gheschickt, opvoeden in dit dal
Om haer na Gods bevel, te leyden en te stieren
Tot deught en eerbaerheyt, in alle goe manieren
Tot Liefd’ van d‛eere Gods, tot ontsagh vande Wet
En de Iustitieel, daers’onder sijn ghezet
Insghelijcx wat beleyt, dat hebben sal de Moeder
Om hare Knecht, of Meyt (op datse veel te vroeder
Haer dingen souden doen) met reden wel lof-saem
Haer onderwijsen sal, op dat daer door bequaem
Haer huysghesin ghesticht, wel gheregeert mach wesen
Op dat haer kinders tsaem, als planten uytghelesen
Daer door werden gheleert, daer door werden ghesticht
Daer door werden ghebracht, tot haer schuldighe plicht,
Dat is tot danckbaerheyt, voor al de groote deughden
En waer ootmoedigheyt, op dat daer door vol vreughden
Haer Ouders sien met lust, een merckelijcke vrucht
Voor al haer sware last, en Christelijcke tucht.

C.V.R. ‘k Verlangh altijt.