Kroniek van Wijnkoper

159

[1491]

[W:]

Op desen tijt sijn die [van Schagen met de] omleggende dorpen bij Alcmaer op smaendachs 6 meij Alcmaer, na beloecken paeschen gecomen om Claes Corf generale rentemeester doot te smijten ende hem niet thuijs vindende hebben sij sijn huys

[159v]

huyse van binnen al in stucken gesmeten al dat daer was, hadden Claes Corff huys geweest sij souden hem geslagen hebben, niet te min sloegen sijn dienaer doot, het was een hel onsint volk ende heel desparaet ende mistrostich doer den grote schattinge dije sij opbrenghen mosten, ende oock versochte heer Jan van Egmont [in marge: stadhouder van Holland] om ruyterghelt van haer te hebben. Een weynich hier na was een grote oploop binnen Alcmaer, ende was altesamen een vergadert volckt scamele gesellen die niet en hadden te verliessen ende waren in grote menichten vergadert ende gingen sitten in de luyder huysse en mosten haer te eten ende te drincken geven ende dit volcke worder alle dagen meerder want sij al heel verarmt waren ende niet en wonnen maar sij sijn met goeder onderwijsinge ter neder soo dat sij al meest uut den stede trocken daer na quam den stadthouder van Hollant omtrent Alcmaer om den rebellen te straffen dan het was hem afgeraden door nuchter redenen ende is terugge getrocken. Die breeder hij van begeert te weten die leest die cronijcke van Hollant