Nieu liedt-boeck ghenaemt Der minnaers harten jacht ofte de Groote Aemstelredamsche rommelzoo
(1627)–Willem Dirckszoon Hooft, Jan Jansz. Starter, Jacob Westerbaen–
AuteursrechtvrijOp de stemme: I have a zove so fair, so Constant firme and kinde.
VRou-Voester van mijn jeughd,
Meesteresse van mijn zinnen,
Mijn hoop, mijn troost, mijn vreughd
Mijn suyvere Goddinne,
Mijn licht, mijn heyl, mijn rust,
Schat-kist van mijn ghedachten,
Springh-ader van mijn lust,
Reviere van mijn klachten:
Siet (bid ick) hoe // ick ben te moe,
Siet hoe ick quijn // deur druck en pijn,
En dat om dy // ach lief lost my // in 't ende
Doen eens uyt dees ellende.
O oorsaeck van mijn min:
Hoe laet ghy my dus klaghen?
Ick hoop niet dat ghy in
Mijn lijen hebt behaghen?
Siet hoe ghewilligh dat
Ick ben om u te dienen,
Ach: wilt my daer voor wat
Doch van u gonst verlienen.
Noyt minnaer heeft // den dach gheleeft,
Die sijn Goddin // met sulcke min,
Stantvasticheyt // en trouwicheyt // beminde
Als ghy mijn lief sult vinde.
Sult ghy o: al mijn vreughd,
O glory der Goddinnen,
O overschoone jeught,
Dus slijten sonder minnen?
Denckt by u selfs met gonst
Dat dese brave leden
Die uyt de hooghste konst
Natuer dus heeft besneden,
De snelle tijt // die niemant mijt
Door d'ouderdom // sal maken krom
En ghy sult dan // het bloeyende van // u jeughde
Quijt wesen sonder vreuchde.
Iupijn was noyt soo seer
Verhit in snoeperijen,
Of ick ben noch veel meer
Verhit int eerbaer vrijen.
Noyt Herculus oock me
Heeft soo ghebrant int minnen
Om sijnen Omphale
Doen sy hem leerde spinnen:
Als ick om u, ach: weest niet schu
Maer mint my weer, want niet ick meer
Begheer tot loon, van u (mijn schoon) goddinne
Als min voor wederminne.
En soo ghy my die gonst
(Mijn Enghel) wilt verlienen
Ick sal met alle konst
V al mijn leven dienen,
| |
[pagina 17]
| |
Dan sien u blijtste daghen
Ghy sult o schoone maeghd
Want al wat u behaeght
Lief dat sal my behaghen,
Wat u verheuight // sal sijn mijn vreught.
En soo daer yet // Goddin gheschiet
Waer over ghy, int minste my, meught klaghen
Dat sal mijn siel mishaghen.
FINIS. |
|