Nieu liedt-boeck ghenaemt Der minnaers harten jacht ofte de Groote Aemstelredamsche rommelzoo

Liedekens. La Vymay

T'Schoonste Nimphie dat hier beneen,
Oyt des Hemels claerheyt bescheen,
Weyghert de soete suyvre min,
In haer Hartghen te laten in.

Maer indiense te recht verstont,

[p. 12]

 

Hoe dat haer Hardertgen is ghewont.

 

K'wedse wel haest sou met een soen,

 

T'krancke Hardertgen bystant doen.

 

Maer dan sijnder soo veel misschien,

 

Datse de trouste niet can sien,

 

Dan tusschen d'een en d'ander leyt,

 

Een groot mercklijck onderscheyt.

 

Dus o Nimphien kiest eens met reen,

 

Uyt soo veel hondert Herders een,

 

Dat ghy u jonghe beste tijdt,

 

Niet met segghen maer doen verslijt.

 

Wilt ghy dan kiesen uyt liefdens kracht,

 

Vint ghy gheen trouwer soo ick acht,

 

Als my, want so ghyt wel besiet,

 

Ick ben u Dienaer al weet ghyt niet.