Het beleg van Gent ten jare 965

Hoe dat den coninc van Inghelant binnen Ghendt compt ende cooren saeyt up de maerct.

Naer dat den heere van Dixmude langhe ghesproken hadde jeghens de Gandoisen es commen by den conynck van Inghelant, segghende dat de Gandoisen wel te vreden waren ende sy consenteerden hem synen eedt te volcommen, uut welcken den conynck van Inghelant met den heere van Dixmude, met noch veel andere heeren t' schepe ghegaen, ende sy quamen totter mueren van der stadt daer sy een gat vonden in de mueren ghesleghen van der stad, welck gad was tusschen de Turrepoorte ende de Santpoorte, duer welcke gad hy binnen quam, ende duer het gad sijnde siende allomme op de borghers van Ghent, dewelcke hem dochten alle fraeye ende coraguesche mannen te syne, alsoo 't ooc waren; siende up de lieden van neerynghe, die alle stonden en wrochten al of sy van gheender

[p. 34]

oorloghe gheweten en hadde, ende track also ter maerct daer hy allomme de backers husen ende wynckels wel voorsien sach van broot. Doen vraechde den conync van Inghelant jeghens den burchgrave van Ghend of de Gandoisen noch so wel ghemoet waren om weercken ende dat se noch so vroylick waren, want men sancker, men clanckere allomme in de huusen ende wynckels al of sy van gheender swaricheyt gheweten en hadden. Daerup dat hem den burchgrave andwoorde dat se meest alle ghesproten sijn uut die edele Trojanen ende uut de Romeynen van Caius Julius Cesar tyde af, ende dat se van gheen oorloochsche feyten vervaert en sijn ende de oorlogh wel ghewone sijn, ende dat se liever hadden in 't velt met de oorloghe te gheneeren dan iet anders te doene, soo dat se oorloghe niet met allen en ontsien, want huerlieder auders de Trojanen ende de Romeynen hebben se so gheleert. So seyde den conynck van Inghelant: ‘'t Es meer dan vij jaren gheleden dat wy voor de stad hebben gheleghen ende al laghen wy noch vij jaren daer voren, wy en souden de stad niet connen ghewinnen.’ Dies so es den conynck van Inghelant commen op de Vrindachmaerct ende daer so heeft hy cooren ghesaeyt tot proffyte van hemlieden, die hetselve cooren indoen saude achtervolghende synen eedt, die alsdoen volcommen was, ende hy heeft God van hemelrijck ghebeden met dit ghebet.