Het beleg van Gent ten jare 965

[p. 22]

Hoe datter veele assauten ende sturmen op de stad waren ghedaen, ende van het uutcomen van den kelder int 's Graven-casteel.

Fray ende substyl ende cloeck ter oorloghen so waren de Gandoysen in feyten van oorloghen, want up den dach van der vierynghe so en saghen se niemant ter vesten noch ter mueren, waeromme dat sy meenden de stad up dien dach ghewonnen te hebben om dat sy niemant en saghen, waeromme den conynck van Inghelant meende dat de Gandoysen ter Oostpoorte uut waren gheloopen ende so ghevloden, maer ten was huerlieder gheenen nood, maer sy maecten hemlien ghereet om haer vianden te gaen bevechten, te wylen dat de Inghelsche ende de Scotten den assaut ende sturme deden, die ghebuerde an de Turrepoorte, trocken veel Gandoysen int 's Graven-casteel, duer den keldere onder d'eerde tot Wondelghem toe, ende staken in brande alle de tenten ende de pauweljoenen van de Ingelsche, die alsdoen tot Mariekeercke met huerlieder legher laghen, ende die ingelsche conynck dede duer het lanckduerich belech die keercke maken, ende voort de Gandoysen roofden den inghelschen legher van als dat sy ghecryghen conden, ende smeten al doot dat sy vonden, ende veele warender ghevanghen. Ditte vernemende den ingelschen conynck, was gheheel verstoort so dat hy byna soude verroet gheworden hebben, daerup die Gandoysen letter ofte niet waren achtende, en de Gandoysen en waren daermede noch niet te vreden. Maer sy quamen uute met scoone ordinancie seer wel ghemonteert met bannieren, veendelen, standaerden ten twee poorten, ter

[p. 23]

Turrepoorte jeghens den Ingelschen conynck, ende ter Graupoorte, die stont by het Sluseken, jeghens den Schotten, ende sy sloeghen van achter also in den steert. Den hertoghe van Pontiers riep dat mer vluchten soude, in de welcke vlucht menich Inghels ende Scot metten hertoghe van Pontiers wiert versleghen, want de Gandoysen velden ende namen den ingelschen standaert met noch bannieren ende veendelen, dies den ingelschen conynck in vreesen was haddy niet achterwaert ghevloden, want de Gandoysen quamen noch eens corts daerna uute van den keldere int's Graven-casteel onder de eerde tot Wondelghem, daer sy groote schade deden onder het carroye ende de tenten ende de pauweljoenen, die van te voren noch niet verbrant en waren, die spolierden ende roofden sy van victailge ende amonicie ende al dat sy ghecryghen conden, ende brochten al duer den keldere onder d'eerde tot in 's Graven-casteel, uut welcken den scotschen coninc dede maken een casteel up het gat van den keldere (daer nu staet S. Katelyne-keerke tot Wondelghem) om dat de Gandoysen niet meer en souden commen duer de vaute ofte keldere want hy seer groote schade ende groot verlies van volcke al duer het uutcomen van de Gandoysen ghehad hadde, maer wiert naer sijn vertrecken wederomme gheopent.