Het beleg van Gent ten jare 965

Hier gheeft den verrader Fane-Phoncion an den Coninc te kennen dat den grave Aernout de cooplieden dwijnct t'zijnder haven te komen.

Soo desen benydere Fane-Phoncion was seer benydende dat Vlaendren begoest te prospereren, hy gaft den coninc van Vranckerijcke te kennen hoe dat den grave Aernaut was dwinghende de cooplieden ter zee ende te lande dat sy moesten commen tot sijnder havene tot Lamminsvliet, nu Sluus, so dat alle de cooplieden ghevloden sijn, ende den grave Aernaut heeft in den sin gheheel u land te bedeerven ende trect die fortselynghe t'synen landen, daer zullen sy vry sijn. Den coninc van Vranckeryke verstaen hebbende ontboot hetselve

[p. 3]

synen sweer, den conynck van Inghelant, ende gaf hem de sake te kennen, den welken hem den raet gaf, als dat hy den grave Aernaut in 't parlement te Parijs ontbieden soude met brief, denwelken brief hier na volcht:

Ghescreven an mynen subdijt,
Ghy, grave Aernaut van Vlaendren,
Ic conynck Kaerle wie overhoorich sijt,
My verwondert dat ghy sijt so staut
Want ic clachte van u hebbe ontfaen,
Dat ghy den coopman rooft ter zee;
Ende up niemant en hacht een ynkel spaen,
Uwe overdaet doet mijnder herten wee,
Inghelsche en Scotten die vanct ghy,
Ende voert se totten landen dy,
Dwelck u onheere ende scade es,
Dus ontbiede ic u dat ghy niet en wilt aflaten,
Te Parijs te commen in 't parlement,
Of blijfdy t' huus ghy wort ghescent,
Obediert ende stelt u onder justicie,
En doedijt niet 't es voor u een groote vicie,
Ic ende mynen vader crachtich
Ontsegghen u ons vrientscap machtich.

Den grave Aernaut den brief ontfanghen hebbende was seer verwondert van dien brief ende vraechde raet an synen heeren wat andworde hy daer uppe soude scryven, daer up die gheslachten van Ghend rieden dat hy te Parijs in 't parlement niet trecken en soude, segghende dat de Franchoisen nochte den Inghelsman niet te betrauwen en sijn, ende dat niet dan envye en was om dat lant van Vlaendren beghint te prospereren van neerynghe ende coopmanschepe, hetwelcke sy gheerne beletten souden, want huerlieder es kennelick hoe dat hier uut Normandien es commen een schip gheladen met honde-vellen

[p. 4]

meer uut schimpe dan anders, om dat sy verstaen hebben wat goet dat men brynct tot Laminsvliet dat terstont vercocht es worden, hetwelcke van de cooplieden ghecocht ende betaelt es, so dat de cooplieden uut Normandien so vele ontfanghen hebben, dat sy niet ghelijk en hebben connen ghedeelen ende malcanderen bebben vermoort om het ghelt, dat sy van de honde-vellen ontfaen hebben, so dat het schip, met alle het ghelt ende de cooplieden daerinne dootligghende, es metter vloet wederomme in de haven commen.