Rymende uyt-legginghe naer den letterlycken, ver-holen ende sedelycken sin, van de honderd ende vyftigh psalmen van den heylighen koninghlycken propheet David

Kort In-houd van den LXVI. Psalm.

Deus misereatur nostri, & benedicat nobis.

Dat God sich onser ontferme, ende ons ghebenedyde.

Naer den Ver-holen sin.

DAvid van Gods gheest gheraeckt,
Naer Messias komste haeckt.

Breeder Uyt-legginghe naer den Ver-holen sin.

O God, die vol zyt van ghenaeden!
Want all' uw' wercken zyn wel-daeden,

Ver-licht met 't licht van uw aen-schyn

All' die op dese wereld zyn.

Ver-ryckt ons, Heer, met uwen seghen,
Laet vallen den ghewenschten reghen;

Dat oock de aerde open-gaet,

En brenght haer vreught tot ieders baet;

Dat alle mensch dach magh aen-schouwen
Den ghen' de hemels sullen douwen,

Den Heyland van het mensch-gheslacht,

Soo langh begheert, soo langh verwacht;

Die alle volck den wegh sal leeren,
Den wegh des heyls, den wegh des Heeren.

In wie ghebenedyd is al

Wat heeft gheleeft, en leven sal.