Chronijcke van Ghendt

XVI^c.

Jnt beghintsel vanden jaere XVI^c, den XVIII Januarij, was binnen Ghendt zeer blijdelic jnne ghehaelt onsen hoochgheboren grave van Vlaenderen Albertus van Oostenrijcke, met zijnder huusvrauwe, des conincx van Spaingen dochtere, omme welcke jncompste groote ghereetschap binnen Ghendt was ghemaect van schoone vertooghen.

Eerst es den grave metter graefnedinne commen tot buyten de Dampoorte, commende van Dendremonde af, waer hem de edele mannen vande stadt, met noch andere edelmannen van andere quaertieren van Vlaenderen, hem teghen reden; voorts zoo trocken hem ooc teghen de schepenen van beede de bancken, pensionarissen ende secretarissen, de schepenen aen hebbende elck eenen langhen zwarten fluweelen keerle, ende de secretarissen elc eenen zwarten sattijnen, daermede dat de peerden, daer zij up saeten, gheheel bedect waeren; de schepenen boden elck eenen Ghendts grauwen keerle; daernaer volchden noch zes veendelen borghers, seer schoone ghemonteert. Ende zijn alsoo ghetrocken tot ande Eembeke, upde Dendermontsche straete, hem aldaer verbeydende. Daer ghecommen zijnde, zoo zijnder twintich ballinghen commen, presenterende den grave een requeste, zeere roepende: ‘Gratie, gratie!’ alwaer de graefnedinne hemlieden een teecken gaf; ende vander

[p. 406]

aerden upstaende, zijn vooren ghecommen jnde stadt, haudende al aen een coorde. Voorts den prince commende bijden Doorenackere, daer laghen de Spaingnaerts up zijn Turcsche ghecleet, maeckende eenen alarem ofte ghevecht jeghens de christenen, het welcke seer fray ende ghenouchelic was om siene, jnde presentie van sijne hoocheyt, die daer bleven stille staende met huerlieder caroche met zes witte peerden. Voorts soo reet den grave met de graefnedinne jnt nieu casteel, alwaer huerl. fraye peerden elck met een zelvere sale bereet was, ende XIIII andere fraye peerden, daer haere staetdochters upsaeten, ende quamen zeer haest uuyte. Item aen sente Jooris poorte daer stonden de vier ordenen mette processien van s^te Baefs ende sente Veerlen, ende de drij bisschoppen van Ghendt, Brugghe ende IJpere, aldaer verbeydende zijn Altese, commende uuyten casteele, hebben (hem) gheleyt seer devotelic singhende Te Deum laudamus, tot jn S^te Baefs keercke, daer een schoon lof ter eeren Godts wiert ghesonghen ende daernaer met alle den stoet naer het hof van sente Baefs gheleedt. Item upde voorseyde S^te Joorisbrugghe ofte poorte daer stont een schoon poorte triumphale, daerjn dat stont hoe dat Belgia, dat es Vlaenderlandt, aen alle zijden bevochten es, niet wetende waer sij hueren toevlucht nemen wilt dan tot Godt den Heere; ende upde zelve poorte, upde sijde naer den Steendam, daer stont hoe dat ons keyser te Ghendt gheboren was. Ende voorts van an sente Jooris poorte tot jnt hof van sente Baefs stonden setelkens, meer dan IX hondert, over beede zijden vande straeten, ende jn elck setelken stont een maechdeken jnt witte ghecleet, elck met een tortse ende eenen lauriertac jnde handt. Item upde Keeremelck brugghe daer laghen vier groote ruesen, up elcke zijde vande brugghe eene, dats twee jnt upcommen ende twee jn tafgaen, bewijsende de vier Ghendtsche

[p. 407]

rivieren, ende de steercte, daer de stadt mede versteerct es. Den eenen ruese liet loopen cooren; den tweeden rooden wijn; den III visschen ende den vierden melck, boter ende appelen. Commende ande Cammerstraete, daer stont een schoon vertooch up een stellaige, van veel personnaigen, bewijsende hoe dat Justitia de oorloghe onder den voet wierp. Commende te Wannekens aerde, bij den waetersteegher, daer hadde de neeringhe vande smeden doen maecken twee smessen, daer dat veel smeden stonden ende vrochten, ende smeedden, groot gheluuyt maeckende van cloppen; van harnassen, braetpannen ende van rappieren ende ander crijchgheweere smeedden zij plouchijsers ende seysenen, ende daer waeren toe bereyt vier ofte vijf boeren met roode wambaysen ende roode broucx, met eenen sack anden aerem ende een cleen oliekanneken ande zijde, die zeer wel cousten den boer maecken, de maniere maeckende om picken ende seysenen te coopen datmen van tarnasch smeedde, bedrijvende veel boerden, daeromme den grave ende graefnedinne zeer loughen. Ende daerneffens, upden houck vande Langhe munte, lach den rooden duvele, daeruuyt dat vloghen menichte van duyven, als zijn hoocheyt daer passeerde. Commende ande Vischmaerct, daer stont een afsluytsel van ande Rebbe tot anden Apoticaris, daerup dat stont gheschildert hoe dat ons moeder Belgia, dat es het Nederlandt, seer ghequetst was; dat was een maecht, daer een pijl jn haeren voet stack ende seer bloede, begheerende vanden grave Albertus ende Ysabella dat hij huer den pijl uuyt trocke, daerbij staende gheschreven: Oostende. Commende tot thalfver Hoochpoort, daer stont een schoone poorte triumphale met drij duerganghen, zeer hooghe, daerup dat jn schilderie stont hoe dat de dochters van Salpha quamen an Josue, begheerende een eerfdeel; ende bij ghelijcken sse stont daer ooc bij hoe dat den

[p. 408]

coninck Philippus, lest overleden, gaf zijn dochter Ysabella voor haer eerfdeel dese XVII Nederlanden, met noch meer ander vertoochsels. Commende aen S^t Jooris hof, was daer ooc een afschutsel ghemaect, daer up stont de sonne ende de mane, die niet en moghen zijn ghescheeden; daerbij stonden gheschildert Albertus ende Ysabella, ende boven haerlieder hoofden stont gheschreven: Simul et semper. Aen tschepenhuus van ghedeele daer stonden schoone stellaigen met schoone vertooghen; daer sadt de Maecht van Ghendt. Commende onder tBelfort, daer stont noch een schoon poorte triumphale; jnsghelijcx noch een schoon poorte voor tcapitel van S^te Baefs. Upden Callanderbeerch stont een seer hooghe pieramide, LXXX voeten hooghe, als eenen turre ghestelt up vier groote hauten bollen, ende boven stont een sphere met een Fortuyne, die drayde metten windt, ende over alle vier de zijden gheschildert met heuropsche bediedenissen. Ende voor sijn hof stont ooc een fautsoen van een poorte.