Chronijcke van Ghendt

XV^c XCVIII.

Upden eersten dach van Sporkele was overghegheven het fort van Pacientie, twelck stont ontrent Waetervliet, ditte voor de somme van XV^c ponden grooten, twelck die van Ghendt betaelden.

Upden XXIIII April quaemen de vrijbuyters tot Hansbeke, Meerentre ende daar ontrent, ende hebben aldaer zeker landtslieden doot ghesmeten, oock eenighe soldaeten vande compagnie van capitein Rijbeke; onder al esser bleven eenen Marten Bale.

.....Item noch jn dit zelve jaer, den VII Wedemaent, wiert binnen Ghendt den pays uuyt gheroepen tusschen den coninck van Spaingnen ende den coninck van Vranckerijcke, waerom binnen Ghendt upden voorschreven VII Junij processie generael ghedreghen wiert. Ende de borghers stonden fray jnde wapen jn drij troupen met bussen ende musketten, te wetene upden Cautere ende Vrijdachmaert de Busschieters, ende de Muskettiers upden Coorenaert, die seer lustich schoten als de processie aldaer passeerde.