Chronijcke van Ghendt

XV^c XXVIII.

Jn dit bovenscreven jaer, ontrent ougstmaent, drouch Jan Buys, handt schoemaeckere, een tortse

[p. 55]

tusschen twee sergeanten ten Groenen briele, voor 't Groen huus, aldaer hij verghiffenisse moeste bidden den ghebueren; ende de tortse was ghedreghen ten Augustijnen; ende moeste daernaer sitten jnden Put, drij daghen, te watere ende ten broode, om dat hij een hoere, die hij te vooren bekendt hadde, wilde leeden met hem te gaen slapen; ende sij riep ende sij creesch al hadt gheweest een maecht. Item hier es te noteren dat doen ter tijt twee openbaer plaetsen te Ghendt waeren, daer men bordeel hielt, te weten Overschelde, daert noch es, ende ten Groenen briele; maer om dat die putiers ende lichte meyssens bij nachte de Augustijnen, die haer mattenen ende diensten songhen, molesteerden ende de ghelaesen jn sticken wierpen, zoo was dat bordeel jn dander Overschelde doen vertrecken.

Item noch jn dit zelve jaer, up den XXVII Januarij, overleet den heere van Ravestein. Ende den raedt quam uuyte, die ghesloten was jeghens de regierders vanden lande, daeromme dat werden ghebannen Joos de Gruutere, Jan de Zuttere ende Daneel de Deckere.

... Item dient alhier noch ghenoteert als vergheten hierboven te schrijven, dat de schepenen vanden jaere XV^c XXVIII waeren, jnde presentie vande commissarissen, bij Jan de Bijtere, eerste secretaris vander kuere, eerst uuytghelesen upde voye vanden torre, staende upde oostzijde vanden nieuwen schepenhuuse.