Chronijcke van Ghendt

[p. 47]

XV^c VIII.

... Jn dit zelve jaer, den XXIII februarij, up eenen vrijdach, tsavons ontrent den vijf hueren, quamen binnen deser stede van Ghendt Maximiliaen, ghecoren keyser van Roome, ende met hem quam hertoghe Caerle, ons eerfachtich prince. Alvooren quamen met hemlieden wel thien hondert voetknechten, elc met eender spijsse, alle ghecleet met roode rocxkens ende roode causens; ende daeruppe stont eenen witten palstere achter ende vooren. Ende daernaer wel twee hondert peerdevolcx, al meest ghewapent, met standaerden zeer triumphantelic. Ende daer reden hem jeghens den apt van Sente Pieters, den apt van Sente Baefs, den hoochbailliu, de wet van Ghendt, den president (van den Raed) van Vlaenderen met sijnen staete, die de propositie dede jnt latijne, al met groote menichte van peerden.

Item eerst stont voor het beelde van Maria, ande poorte, acht tortsen, ende vande Dendermonsche poorte tot S^te Baefs stonden, over beede de zijden vande straete, LXXXIIII candelaers, ghemaect met S^te Andries cruusen, ende up elcke cruyse drij tortsen; ende aen het tabernakele aen sprincen hof stonden vijf tortsen, dus stonden daer ten laste vande ghebueren van Sente Baefs twee hondert vijftich tortsen. Men toochde aen tkeerchof een schoone figuere. Item vanden cloostere tot jnde stede stonden up candelaers met sente Andries cruusen ghemaect vier hondert tortsen.

Item upden Ham stacmen te waetere met schepen, doen hij daer lijdende was, ende stonden jnt zelve waeter up staecken ghestelt dertich pectonnen; ende noch jn den Ham, up sheerders torre, hondert tortsen. Item men sach uuyt alle de torren van Ghendt steken vierpannen; (in) de straeten waeren over beyde zijden, van daer hij quam tot jnt hof, vijf hondert ende vijftich

[p. 48]

candelaers, ende elcken candelaere hadde drij tortsen ende drij tinnen platteelen; ende dezelve waeren gheveerwet root, wit ende ghelu, ende men lietse staen alle den nacht; ende de poortie vande stede vande tortsen bedroech XVIII hondert. Ende tusschen elck vande stede candelaers sadt een maecht up een tonne, ghedect met tapijtserie, ende elck met een tortse jnde handt, ende eenen bouck jn dander handt. Item up de Veerckens ofte Beestemarct ende Sandtbeerch stonden drij masten gherecht, elc met een crom cruuse met tortsen, bedrouch tsamen XXXVI tortsen, ende up den Zantbeerch stonden metten crompsele upden steenput twee hondert tortsen. Item up de tapijtsiers huus waeren onder ende boven twee hondert tortsen ende al met tapijtserien behanghen, ende daer stont een figuere. Item de Hoochpoort was overspannen met coorden, over de straete; daeranne hinghen vijfhoucken, up elcken houck vijf tortsen; daer waeren vijfenveertich houcken, dus daer vande tortsen II^c; voor de meersseniers huus wayst al becleet met tortsen, jnt ghetal van hondert vijftich. Up thof vanden ouden gulde van S^te Jooris stonden drij hondert tortsen, ende recht jeghens over vierden den hueverdeken met alle de dekenen met hondert tortsen. Ende recht teghen tschepenhuus over, vierde dhaude gulden van sente Sebastiaen met hondert ende vier tortsen. Item aen het Schepenhuus was ghemaect een costelicke poorte, up welcke poorte stonden de vier leden slandts met speellieden, ende was van schilderie seer costelic. Item aen het sGraven steen stont ooc een poorte ghemaect, mette schalmeijers deser stede, ende daer waeren up LXXIII tortsen; daer waeren baillien ghemaect over beede de zijden vande straeten, van peerden, daer heere ende wet stonden, elc met eender tortse jnde handt, ende naer schepenen hem streckende de poorters;

[p. 49]

ende over dander zijde de schepenen van ghedeele ende den hueverdeken met zijne dekenen ende de gheswoorne vande weverie. De brauwers vierden teghen over tschepenhuus met hondert LXXV tortsen; die vande weverie vierden jnde Zwane met hondert vijftich tortsen; de gautsmeden jeghens over up haerlieder huus met tzestich tortsen; de scheppers vierden jnden Ketele met hondert XIX tortsen; de tijcwevers vierden jnden Arent up doochpoort met twaelf staigen hooghe ende XX voeten hooghe boven den huuse, met zes trompetten, ende hadden vijf hondert ende XXV tortsen; de smeden vierden jnden Rooden hoet met hondert XXV tortsen, staende alle in S^te Andries cruysen, met vier trompetten; de Vischmaerct hadde doen maecken een langhe stellinghe, daer kinderen van XII jaren up staecken te peerde, al jnt harnasch. Daer laghen jonghe maedekens ten steecspele ende men rieper: Bourgoingnen! ende braken menighe lansse. Daer waeren twee herrauten, deene vanden keysere ende dander vanden grave; deene riep: Noël! ende dander Oostenrijcke! Ende die trompetten sloughen. Ende daer stonden upde zelve stellinghe hondert tortsen. De schiplieden vierden upde Vischmaerct met zes hondert ende vijftich tortsen seer triumphantelic ende jnt midden stont een roose met XXXVI beckenen, ende voor elck becken een tortse; de roose draeyde. De vleesschhauwers vierden voor tvleeschhuus met hondert tortsen; de vischcoopers vierden voor haerl. huus met hondert LXX tortsen, ende jnt midden van sGraven brugghe stont een zeer schoone costelicke poorte ghemaect, daerup dat stonden LIIII tortsen met trompetten. Ende up de Veerle plaetse stont een figuere, ende men vierder ooc zeer costelic met drij hondert tortsen; over de Hooftbrugghe was een figuere ghestelt, ende ande Drake was ghemaect een rijckelicke poorte, ende vande Drake tot aen het

[p. 50]

ohf was de straete behanghen met witte laeckenen over beede zijden, ende hadden vier hondert vijftich tortsen lancx de straete staende upde stellinghe, ende hadden een figuere staende upde plaetse voor thof. Den cost die ghedaen was en was niet om segghen. Ende tsanderdaechs naer zijn jncompste dede hij eedt tS^te Jans jnde keercke, als voocht ende momboor van hertoghe Caerle; ende naer dat hij eedt ghedaen hadde, soo was te Ghendt een collatie upghedaen, dat den keyser begheerde up alle de landen van hertoghe Caerle vijf hondert duysent croonen, van XLVIII grooten tstick, waeraf de poortie van die van Ghendt drouch zessendertich hondert ponden grooten. Ende jndien dat die van Ghendt consenteerden, zo was hij te vreden dat die van Ghendt ontstonden met derthien hondert ponden grooten. Ende des anderdaechs naer dat gheconsenteert was, zoo vertrac hij uuyter stede.

Item was ooc up den XXV februarij een steeckspel up de Vrijdachmaert ghedaen; onder andere daer was eenen Bauwen Borluyt, poorter van Ghendt, de welcke behaelde den prijs vande jonckvrauwen tsavons jnt hof vanden prince.