XIIIIc LXXXVII.
Jnt voorn. jaer ende schependom, jnde Maerte, waeren te Ghendt ghevanghen jnt Sauselet dese naervolghende persoonen: eerst mher Jan vander Gracht, ruddere, Jan Uuyten hove, fs Jans, Michiel de Vroede, advocaet jnden Raede van Vlaenderen, Pieter Goossins, Denijs vander Sare, Joos de Rijdts, Pieter Beys, cupere, Jan de Wilde, brauwere, ende Steven Moerslach. Ende schepenen vander kuere lieten dese voors. persoonen executeren bij nachte van eenen Remeus Hubert, schoenmaeckere. Ende daer was bij Jan ende Willem vander Vennen, Lieven van Roesen, Olivier Vaenkens ende meer andere. Ende Jan Fant die drouch het bloet uuyte jn eenen eemere, jnde heymelichede, telcken alsser eenen onthooft was; ende tghebuerde voor den aultaer vanden Sauselette, maer Steven Moerslach was ghebiecht ende zijn haer afghesneden ofte ghecort, maer duer de bede van broeder Willem Moerslach, tzelfs Stevens broeder, de welcke was biechtvader van alle anderen, ende midts der bede vanden anderen broedere vande Augustijnen, zijnen medebroeder, de welcke vielen up haerl. knien, biddende Remeus den capitein duer de passie Godts voor den voorn. Steven. Ende duer de groote bede zoo sprack den capitein Remeus: ‘Steven, staet op, jck gheve hu u lijf.’
Auteursrecht onbekend