De schadt-kiste der philosophen ende poeten
(1621)–Jan Thieullier–
Auteursrechtvrij
[pagina 203]
| |
Terwen bloetsel tot Aerschodt.Refereyn.
O Wonderlijcke werelt, vol fantasijen,, blint
Hoe onrustelijck, men v, tot allen tijen,, vint
O allendich mensche, die daer in leuen,, moet
Hoe subtijlijck, haer schalckheyt, v wel te meijn,, dint
Door t'ualschelijck bedroch, d'welck sy in-gheuen,, doet
Al waerdij wijs, als der wijse griecken seuen,, vroet
Ga naar margenoot+ Als Solon, Chilo, Cleobulus, merckt, den sin,, hier
Als Thales, Bias, Pittacus, euen,, goet
En als Periander, Iae meer en niet min,, schier
Ghy haddet, wel, al van doen, in den beghin,, fier
Al waer, allen hun wijsheyt, voor v ghespaert,, snel
V sou, des noch ghebreken, soo ick v bekin,, dier
Al leerden sy elck, ter dueghden, het naert,, sel
T'swerelts boosheyt, is te vals, waert beter soo waert,, wel
Elckx tijt, elck Iaer, elck mensch, van besonder ghespuer,, is
Dus machmen wel segghen, soo ick hier vermaert,, stel
Dat den besten tijt, der werelt, al deur,, is
Ga naar margenoot+ ARistarchus die seyt, hoort) op sijn vercleren,, let
Dat wy niet en weten, wat, te begheren,, net
Oft wat te schouwen, door ons onghestadicheyt,, cranck
Want elcken dach verandert hem, int gheneren,, wet
En den tijt vlieght wech, in onuersaedicheyt,, stranck
Elck is onderworpen, alder misdaedicheyt,, sanck
Dat men niet en weet, wat doen, oft laeten,, yet
Men hoort wel daeghelijckx, veel beraedicheyt,, vranck
Dat d'een den anderen, altijt te baeten,, biet
Elck wilt elckx saeck verstaen, hun selfs sy en vaeten,, niet
Ga naar margenoot+ Soo ons Fubius verclaert, alleijnelijck,, d'werck
Elck is schalck te gheuen, ander lieden, raet, en,, siet
Op hun eyghen saecken, nemen sy cleynelijck,, merck
Dies acht ick den mensch hier, een onreynelijck,, clerck
Niet alleen, t'eender plaetsen, dies t'hert int ghetruer,, is
Maer al-omme, dies segh ick, ghemeynelijck,, sterck
Dat den besten tijt, der werelt, al duer,, is.
| |
[pagina 204]
| |
AL waert dat den mensch, een leuen leyden,, mocht
Als Diogenes Cinicus, die verscheyden,, plocht
Ga naar margenoot+ Sijn leuen in willighe Armoed te eynde,, fijn
De werelt is te vals, die sulckx te bereyden,, brocht
Soumen verfoijen, verachten, in versteijnde,, schijn
Want elck wilt al euen, wijs, rijck, en verweijnde,, sijn
Elck wilt hem ter werelt, in t'swerelts staet,, houwen
Die den mensch tot deught vermaent, wenstmen ghescheijnde,, pijn
En men sietse telcker ste, in elcke straet,, schouwen
Iae men sietse by naer, in d'ansicht, door haet,, spouwen
Want men hoort nu niet, dan van gheberen,, en woecken
Alsmen den mensch sou, tot deught, oft caritaet,, stouwen
Dan en hoortmen toch niet, dan sweren,, en vloecken
Ga naar margenoot+ Men hoefde wel met een, lanteren,, te soecken
Eenen goeden mensch, weer hy achter oft vuer,, is
Als Diogenes, dies ons, mach deren,, t'uercloecken
Dat den besten tijt, der werelt, al duer,, is.
| |
Prince.VVAt willick al veel, van die werelt schrijuen,, toch
De werelt is de werelt, en t'moetse blijuen,, noch
Wat willen wijse, verachten, oft verstooten,, dan
T'menschen valsheyt, en canmer, niet wt ghedrijuen,, och
Den tijt is t'allendich, men vinter ghenooten,, van
Want hoe machtich, hoe rijck, hoe sterck, hoe grooten,, man
Elck een hem terstont, onder t'swerelts macht,, gheeft
De werelt hoort toe Iustitie, recht, door-en,, ban
En den tijt, d'winght den mensch, dat hy onbedacht,, leeft
Waer door den mensch, voor deught, aen t'swerelts pracht,, cleeft
Ga naar margenoot+ Nochtans Crates en Socrates ons anders leert,, bat
Die elck hun gout, in de see werp, en versmacht,, heeft
Om dat sijt gelt, en de deught, een groot ghe-eert,, schat
Niet en costen bewaeren, t'samen vermeert,, wat
Hierom beminde, siet toch wat den cuer,, is
En volght dees leeringh in v hert, dit went, en keert,, dat
Dat den besten tijt, der werelt, al deur is.
M. Lemmens
Door Ionst en Minne. |
|