Corenblom tot Brvssel.
Een nievvv liedeken,
Op de wijse vanden Prince van Parmen.
Verheucht v al, maeckt bley geschal,
Sijn Hoocheyt is gearriueert,
Die ons misval,, te niet doen sal,
Van al dat daer is ghepasseert.
COmt altemael,, int generael
Om musicael,, met soete tael
Te singhen een nieu liet plaisant
Voor ons reyn maeght wt liefden brant
Rethorica welsprekentheyt
Ontsluyt den geest,, voor minst en meest
Vry onbevreest,, in dese feest,
VVant den dach die is daer toe bereyt.
Godt Tmolus ient,, wilt ons ontrent
Comen om t'aenhooren t'gheclanck,
Om hier present,, goet jugement
Te gheuen van wijs, dicht, en sanck,
Op dat elck ons mach weten danck,
T'recht hauden goet,, datmen hun doet,
Helpt ons ghespan,, toch wysen dan
VVie dat hier van,, prijs halen can,
Van alle dees edel stemmen soet.
Laet clincken eel,, elck een sijn keel,
Om prijs te halen van het liet,
Als Phoebus veel door t' soet gespeel
Prijs wan bouen Pans pijp van riet,
VVaer deur haet en nijt is gheschiet,
Om dat vonnis voorwaer aldaer,
Maer om Midas,, sulcx nijdich was,
Liet op dat pas,, Apollo ras
Sijn ooren lanck wassen oock met haer.
Minerua schoon,, gaet naer den throon,
Haelt de Musen met haesten snel,
Seght hun persoon dat sy den thoon
Met brenghen van hun snaren spel,
Om daer met te verheughen wel
De gheesten al bly vol virtuyt,
Dat sij ghelijck,, met sanck publijck
Spelen musijck,, int rethorijck,
VVant sanck en spel maect een soet geluyt.
| |
Prince.
Prins goedertier,, wilt v bannier
VVsteken met sint Ians Blasoen,
Voor minnaers fier,, die nu toch hier
Commen eer doen,, aen die Peoen,
Ontfanckt den derden Mey voor noen
Dit liet van t'Corenblomken blau,
In eer en deucht,, van ieucht sticht vreucht,
Op dat ghy meucht,, blijuen verheucht
Met Godt in vrede broeders ghetrau.
Corenbloemken ieucht,, sticht vreucht.
Ontslvyt den Geest.
|
|
Auteursrechtvrij