Devote oeffeninghe op de vijf lettere van de soete ende alderheylichste namen Iesus ende Maria

[p. 441]

Vande Weduwen.

Stem: De winter is ons vergangen, &c.

1. Ghy Weeukens wilt Godt behaghen
In uwen weeuwelijcken staet,
En wijselijck wilt verjaghen
Alle ydel’ manieren quaet,
Neerstich wacht u van praten
Paulus is u een Medecijn,
Loopt niet veel by der straten,
Wildy oprechte weduwen zijn.

2. Is uwen Man overleden
Slacht de wijse Iudith jent,
Begheeft u tot eensaemheden
In u bidt-kamer excellent,
Wilt niet van ydelheyt spreecken,
Godts gratie neemt in waer,
V passien doch wilt breecken,
Wilt ghy zijn als Weduwen claer,

[p. 442]

 

3. Met vasten ende waecken

 

Straft u natuer rebel,

 

Na soberheyt wilt haecken

 

Laet brasserye fel,

 

Anna de Prophetersse

 

Schoude die als fenijn,

 

De goede Matronersse

 

Sal u een Spieghel zijn.

 

 

 

4. Als Elisabeth weest ootmoedigh

 

Denckt hoe sy heeft gheleeft,

 

Sy was niet hoochmoedich

 

Siet wat exempel sy gheeft,

 

Volght ghy haer deught ghepresen

 

Ghy sult ontfaen sestichfout

 

V Wooning’ sal hier na wesen

 

Daer de straten zijn van gout.

 

 

 

5. De suyverheyt wilt beminnen

 

Recht of ghy waert een maeght,

 

Soeckt in u hert van binnen

 

Hem die de suyverheyt behaeght,

 

Ghy moet hem draghen alleyne

[p. 443]

 

En dienen met liefd’ en lust,

 

V beddeken moet zijn reyne

 

Daer den Bruydegom op rust.

 

 

 

6. Princesse wilt onderhouwen

 

Desen staet die is u goet,

 

En wilt geen Man meer trouwen,

 

Let wat de Tortel-duyve doet,

 

Nae haer gaeykens treurich af-lijven

 

Sy en kiest gheen ander weer,

 

Alsoo wilt oock aenclijven

 

Den Bruydegom Godt den Heer.