Devote oeffeninghe op de vijf lettere van de soete ende alderheylichste namen Iesus ende Maria

Een Ghebedt van S. Bernardus tot Iesum.

O Soete Iesus, o aldergenadigste Iesus, o aldersoetste Iesus, o Iesus, soon der gebenedijde maget Maria, vol van bermhertigheyt, ende goedertierenheyt. O soete Iesus, na u groote bermhertigheydt ontfermt u mijnder. O aldergenadighste Iesus: bidde u, door u preciese Bloet, dat ghy voor die sonden hebt willen verstorten, suyvert mijn van alle mijn onrechtveerdigheden: Siet op

[p. 14]

mijn ellendigheydt, die hoe wel onweerdich, begeere ootmoedelic quijtscheldinge, ende aenroepe uwer H. naem Iesus. O naem Iesus, een soeten naem, is uwe naam Iesus, eenen naem ons allen versterckende: want, wat is Iesus anders dan Salichmaker? Hierom o Iesus, om uwen H. naems wille, zijt mijnen Iesus, ende maeckt my saligh, wilt my niet verdoeme, dien ghy van niet geschapen hebt. O goede Iesus, laet mijn in boosheydt niet vergaen, die my ghemaeckt hebt na u almogende goetheydt. O soete Iesus erkent dat u is, ende wist uyt dat ghy niet en zijt. O goedertierenste Iesus, ontfermt u mijnder, wijlen het tijt is van t’ontfermen, op dat ghy my niet en verdoemt in den dag des oordeels. Wat profijt sal’t zijn in u bloet aengaende mijn persoon, als ick sal neder dalen in d’eeuwighe verdoemenisse. Die dooden o Heere Iesus, en sullen u niet

[p. 15]

loven, noch oock alle die neder dalen ter hellen. O aldersuyverste Iesus. O Iesus ons begheert boven alle. O aldersachtmoedighste Iesus. O Iesus, Iesus, Iesus, laet my ingaen in’t getal van u uytverkoren. O Iesus Salighmaker aller die in u ghelooven. O Iesus troost aller die haer toevlucht tot u nemen. O soeten Iesus, vergiffenisse aller sonden. O Iesus, soon van die gebenedijde maget Maria, stort in my uwe gratie, wijsheydt, liefde, suyverheyt, ende ootmoedigheydt, op dat ick u volkomelijck lief hebbe: u love, u gebenedije, u diene, ende in u gloriere, met alle die aenroepen uwen heyligen Naem, welcke is Iesus.