[Voorwoord]
Aen de gunstige liefhebbers der edelder Musycken, Thielman Susato,
Aleest so dat ick binnen corten jaren hertwarts, diuersche stucken
van Musycken, als missen moeteten, ende sekere menichte van
walschen liedekens (so eenen iegelycken wel kenlyck is) inden
druck hebbe laten wtgaen, so is nochtans altoos myn
sonderlinge voernemen geweest de edele hemelsche konst der
musycken in onser nederlantscher moedertalen, oock in 't licht
te brengene, gelyck deselve in de latynsche, walsche, ende
italiaensche sprake, seere bekendt ende in allen landen
vutgebreydt is geworden, Ende om dit so eer so lieuer int
werck te brengene, hebbic met grooter neersticheit tsamen
ghebrocht de beste, constighste vutgelesenste 66 liedekens,
by constighe meesters in onser moederspraken gecomposeert die
my mogelyck syn geweest te gecrygene vuten welcken, ick
(achterlatende die doer oneerlycke woirden tot onduegden
verwecken mogen,) drye boexkens in handen hebbe, daer af ick
dit tegewoirdich voer dierste ierst vutgeue, het tweede sal
corts volgen, ende het derde daerna, daerinne niet syn en sal
dan nieuwe pauanen, galiarden, basse dansen, ronden
allemagnien, tottertyt toe dat ick meer diergelycke constige
stucken, in deser onser spraken ghestelt, gecrijgen mach,
Biddende hier omme allen ende eenen iegelycken van V, O ghy
constighe geesten, tot musicale compositie lust hebbende, dat
ghy V somtyts begeuen wilt uwe konste te thoonene in
liedekens, oft andere gelycken stucken in rime, oft prose,
geestelyck oft veerlycke, op onze vorsz. nederlandsche
moedertalen, ende my die toe te schickenen, om deselve tot
uwer eeren ende gemeynen orboire in allen landen duer den
druck vutgebreydt te wordene, mits scouwende alle oneerlycke
ende onbetamelycke woorden, daer duere dese edele hemelsche
konst veroneert en de ionge geesten bevleckt ende verargert
mochten worden, die (ter contrarie) daer duere tot
deugdelycken exercitatien behoren geschickt te wordene, want
Musica is een sunderlinge hemelsche gave van god geordineert,
ende den menschen gegeven, niet tot oneerlycke oft
lichtuerdigen misbruycke, maer om hem voer al dankelyck te
lovene, ledicheit te schouwene, tyt te winnene, melancolie te
veriagene, onlust te verdriuene, sware geesten te verlichtene,
beroerde herten te verhuegene, En waeromme en soudemen dat
voortane niet also wel met gelycker konst ende soetichheit in
onser moederspraken connen gedoen, alsmen tot nu toe in
latynsche, walsche ende italiaenscbe sprake gedaen heeft? is
de konst ende soeticheit even gelyck, waerom salmen die meer
om deene dan om dander sprake wille verachten? Laet ons dan
voortane alle neersticheyt doen, om onse vaderlandsche
musycke, die niet vau minder konst ende soeticheit en is dan
andere, allomme int openbaer ende gemeyn ghebruyck te
brengene, gelyck andere tot nu toe gedaen hebben, hiermede syt
gode alder konsten geuere bevolen, Tantwerpen.
Auteursrecht onbekend