Tweede muziekboeksken

36.

Wy comen hier gelopen;
ons gelt is al verteert.
Ons cleeren wy vercoopen;
den cost geeft ons den weert.
Als wy niet meer betalen
dan eest "packt wt
"ghy, vuyle druyt!
"ick sal den dienaer haelen".
Wat sullen wy bedrieven?
wy dragen die buerse plat,
van coude wy verstyven,
ons cleeren syn al een gat.
Al sonder pot oft heyse
naer bystervelt
noch broot noch gelt,
so nemen wy ons reyse.
Hoert! leken en clercken,
die van ons syn besmet:
luyaerts, die selden wercken,
die syn al an ons wet
Sinte Reynwt, die is ons paige.
'T schip is bereet,
soe elck wel weet,
compt doet u pelgremaige.