Refereinenbundel, Anno 1524

[p. 102]

Refereijn LIV
Der werlt vruecht sijn scoone vrouwen

⁺NOyt meerder vruecht die god ons hier brachte
dan vrouwen gheslachte
nae onse machte
Moeten wijse houwen in werden
soe tuycht sin memorie en verstant
Want in ghenen lant
men nije en vant
werdigher present op deser erden
Hadic wiens therte begeerden
sonder blamacie
Schoon vrouwen die vruecht vermeerden
van sueter nacie
Soe diep staen sy in elcks gracie
al brenghen sy quay temptacie
ic moet dit segghen al sout my rouwen
Der werlt vruecht syn schoone vrouwen

Een schoon vrouwe een lieflick beelt
alle eer beueelt
en ongheruchte queelt
elc verblijt hem bouen maten
Haer vriendelike woorden syn verhuechelijck
haer oochskens vruechdelyck
het waer onmuechdelyck
datmen haer vrientscap soude laten
⁺Ic en cant ghegronden noch gheuaten
soe excellent
dat vroukens syn van fieren ghelate
hoe groot bekent
Waer sy syn daer is vruechd omtrent
haer minne prent
int herte diese mit oghen aeschouwen
der werlt vruecht syn schone vrouwen

+ Fol. 68^v (lvii^v)

+ Fol. 69 (lviii)

[p. 103]

 

Al mochtmen alle ghenuechte versieren

 

en die hantieren

35

in wat manieren

 

datmense nu in deser werlt vint

 

Trompetten claretten van schoon virtuten

 

herpen fluijten

 

orghelen en luijten

40

alle instrumenten diemen versint

 

sonder schoon vrouwen men achtes twint

 

Al waer siluer of gout

 

een vrouwe al meer vruechden ontbint

 

die rechte liefde hout

45

Hoe groten cost bi haer mij niet en rout

 

al eest dat den budel flout

 

ic wil myn segghen altyt behouwen

 

der werlt vruecht syn schone vrouwen

 

 

 

Prinche

 

 

 

⁺Myn slecht ghedicht sy v bequame

50

al eest dat ic my scame

 

nochtans moet ic der vrouwen name

 

altijt eeren sonder verflouwen

 

Om eender suuerder maget puere

 

wil ic haer natuere

55

alle myn leuen duere

 

hen altyts dienen wt goeder trouwen

 

want der werlt vruecht syn scone vrouwen

+ Fol. 69^v (lviii^v)