Dialectike ofte bewysconst

Definitie XXVII.

Definitie is een reden, verclarende vvat Yet sy.
Verclaringhe.

ALs yemandt willende bedieden wat Goudt sy, seght, Goudt is tswaerste Metael; dese reden, overmidts sy verclaert wat Yet (te weten Goudt) sy, wort gheseyt Definitie, welck

[p. 31]

woort vanden Latijne commende, men op Duytsch eyghentlick noemen mach Bepaling, ghelijckspreuckelick gheseyt van Bepaling des Landts, want alsoo daer duer beteeckent wort een seker saecke, binnen haer palen begrepen, ende afghesondert van allen anderen; Alsoo oock door dese Reden, wort beteeckent, yet eyghentlick afghesondert van allen anderen; Ende soudent wel Bepalinghe noemen, inde plaetse van Definitie, ten ware dit by velen int Duytsch seer ghebruyckt wort, ende dat onghehoort is. Alsoo dan alle Reden verclarende wat yet sy, soo wel door de Anclevende, (welck sommighe Beschrijvinghe noemen) als door de Wesentlickheden; Oock mede eens woorts, dat Uytlegghen gheseyt wort, als du pain, is broot; noemen wy generalick Definitie, daer af wy breeder sullen spreecken, ende reden gheven int Aenhangsel.