Diversche refereynen ende liedekens, uut Hollant, ende Zeelant(1582)–Pieter Sterlincx– Auteursrechtvrijvan verscheyden beminders der Consten ghelesen, ende gesonghen, inde Heerlijcheyt van Heenvliet, Ten versoecke van Peeter Sterlinx, den derden September 1580 Vorige Volgende [Folio C8r] [fol. C8r] Refereyn Vvy Rethorices geesten die conste beminnen, Minst metten meesten zijn wy bereyt Omn op uwe vraghen antwoort te beghinnen Versinnen wilt doch wat v wert geseyt, Waer wt de liefde haren oorspronck heyt Is wt het ghesichte ick segt v voorwaer, Alst wel bleeck aen Hipsiphille twert v wtgeleyt Doen sy Iason quam int openbaer Tghesichte deet vier branden in heur seer claer Dat de liefde in haer soo seer was ontsteken Deur mistroosticheyt sy van tgeberchte viel seer swaer Ende heeft haer inde Zee ghestreken Medea heeft Iason soo seer aenghekeken Soo dat haer herte van liefde heeft ghebeeft Deur tghesichte, de liefde haren oorspronck heeft. Ombartus een Coninck rijck ende machtich Heeft hy deur tghesichte niet sijn liefde gheleyt Om een ionghe dochter, ick segt v crachtich Die simpel van gheboorte was, twert v gheseyt Priamus deurt ghesichte, was hy niet bereyt Om zy zeluen therte door gaen te keruen, Thisbe die ouer schoone in alle schoonheyt, Wilde zy niet deur tghesichte in liefde steruen, Mars moeste hy oock niet in smaetheyt sweruen Doen hem Vulcanus in sijn yserwerck met liste sloot Om dat hy die schoone Venus niet wilde deruen Die hem soo Amoureuselijck haer mondeken boot Mercurio die saecke oock niet en verdroot Hy hadde oock nobel willen spelen met Venus beleeft Deur tghesichte, de liefde haren oorspronc heeft. [Folio C8v] [fol. C8v] Duert ghesichte die Oude Susanna begeerden Ende waren in haer liefde barnende groot D’exploot des viers niet en Censseerde, Maer brande in Dauidt duer liefde minioot Als sy die schoone Bersabea sach naeckt ende bloot Moest duert ghesichte Samson in droefheyt sweruen Soo dat hy rustede in Dalidas schoot Die hem seer ras zijn haer af ghinck keruen Salomon wilde ooc geen wt lantsche vrouwen deruen, Daerom ghinck hy die wech des Heeren besijden Phutyphaers huysvrouwe wilde van liefde steruen Om dat sy met Ioseph niet mochte verblijden Duert ghesichte van Iudith quam oock in lijden Holofenis den Prince die heeft ghesneeft Duer tghesichte die liefde haren oorspronck heeft. Princelijcke Prince duert ghesichte puere Schoonder figuere en wasser noyt verschoont, Als die schoone Breseda schoon van natuere Binnen die Troysche mueren was zy ghecroont Troylus heeft zijn liefde aen haer ghetoont In den tempel van Dyana hy haer dick aenschouden Hoe wel de liefde hem niet werde gheloont Vrolijcken hy daer nochtans op bouden Arphaxadt den Coninck in liefde woude Deurt ghesichte van Ester was hy beuanghen In reynder liefde twelck hem niet en roude Iacop deurt ghesichte van Raechel verlanghen Die liefde ghinck hem soo seer aenhanghen Veerthien iaren Venus webbe hy heeft gheweest Duer tghesichte die liefde haren oorspronck heeft. T’spruyt wt Ionckheyt. Nieuwenhoven. Vorige Volgende
Auteursrechtvrij