Refereyn int Amoureus.
Daer zijn veel middelen den mensche gheiont,
Daer door dat de liefde, wat oorsproncks heeft
D’een aende eerbaerheyt die van hem wort vermont
D’ander, om dat hy in veel deuchden sweeft
De derde, om de schoonheyt die hem aencleeft
De vierde, door zijn lustich singhen met gratie:
De vijfde, door eloquentie, die hem niet begheeft,
De seste, door een moedighe dominatie,
De seuenste, door eenighe insinuatie,
De achtste, door veel prijsen ende louen
De neghende, door minnelijcke conuersatie
De thiende, om datmer veel siet verschouen,
Dan ick segghe (op de vraege als bouen)
Op dat my gheen rechte solutij soud’ ontbreken:
Doort ghesichte, met reyn begeerte ontsteken.
Dat een reijn ghesichte daer van den oorspronck // is
Can Iulij Cesar, en Cleopatra, betoonen
Crusa, en Eneander, namen desen wronck // wis
Iason, en Medea, sullen dit oock verschoonen,
Ene is, conde Dido, daer door oock hoonen,
Paris, en Helena, zijn dus int spel gheraeckt
Vlisses, moeste daerom Penelope, croonen
Phillis, daerom op Demophon seer craeckt
Agamemnon, daerom ontschaeckt
Hercules, liet hem van Omphaie verdoouen
Phedra, Hipelitus, daer door ghenaeckt
En Ariadne, moest Thesus, daer by gheloouen
Accontius, conde Cidippe soo beroouen
Waer door ick blijue by mijn eerste treken
Doort ghesichte, met reyn begheerte ontsteken.
| |
Wilt ghy de Poëten hier in beclaeghen
Als oft sy de waerheyt niet hadden gheschreuen,
Laet ons hooren wat alle minnaers ghewaeghen
En wat getuychenis dat zy sullen gheuen,
Ia oordeelt vry, alle die daer noch leuen
Ghemint hebbende, en die noch beminnen
Is door tghesichte den oorspronck niet ghedreuen
Vande Liefde, die ghy draecht int herte binnen
Want al hadde v Lief haer volcomen vijf sinnen
Oft Venus schoonheyt, ende Pallas verstant,
Ia alle volmaechtheden diemen can ghewinnen
Tis v onnut, siet ghy niet dees gauen vaillant
Waer door thert tot haer crijcht begheerte playsant,
Dies ick noch segghe, al soudijt wreken
Door tgesichte, met reyn begheerte ontsteken.
Prince tghesicht is oorspronck van desen,
Tghesichte is oorspronck van elck minnaer
Door tghesichte, canmen minnebrieuen lesen
En die secretelijck beantwoorden voorwaer
Door tghesichte belouen sy malcander eenpaer
Vreucht ende vrientschappe, in alle contreyen
Tghesichte seyt oock dickwils: Ia seer claer
Dat de tonghe niet en derf bescheyen,
Ia door tghesichte haer alle minnaers bereyen
Om stoutelijck haer liefkens aen te ranssen,
Door tghesichte connen sy wtwendich schreyen
Om alsoo tghelooue daer op te doen danssen
Tghesichte moet ghebruycken groot en cleene hanssen
Waerom soud’ ick dan niet deruen spreken
Door tghesichte, met reyn begheerte ontsteken.
Corrigez sans reproche,
Briele.
|
|
Auteursrechtvrij