Diversche refereynen ende liedekens, uut Hollant, ende Zeelant(1582)–Pieter Sterlincx– Auteursrechtvrijvan verscheyden beminders der Consten ghelesen, ende gesonghen, inde Heerlijcheyt van Heenvliet, Ten versoecke van Peeter Sterlinx, den derden September 1580 Vorige Volgende [Folio C4r] [fol. C4r] Refereyn Als ick noch niet en wiste wat liefde was En hy goet gheselschap mede quam te pas, Daer by een waren songelingen en ionckfrouwen, Niet wetende hoemen der minnen blomen las Zijnde als een kint, onnoosel in dat cas Werde van Cupido gheschoten seer ras Mits ic een schoone bloeme eens began t’aenschouwen Mijn verwe verschoot, ick en can my niet onthouwen Dan stelde my by haer, doch t’herte docht my beuen En was nochtans verheucht, brandende met benouwen Naer dat zy een liet constich hadde op gheheuen, Daer zy der Goden minne in heeft ghedreuen Mijn lijf ende ziel ghaf ick haer stracx te voren Dus quam d’oorspronck der liefde die my is gebleuen Inwendich int herte door aensien en hooren. Als mijn hert aensach haer clare bruyn ooghen Ben inden Gheest der liefden, op ghetogen Dat ick selfs niet en wist wat dat ick dede, Ick sochte liefde te toonen wel naer mijn vermoghen Haer mondeken root met knien gheboghen Had ick wel ghecust dan sorchde bedroghen Te zijn, en soo my te maecken onvrede Haeren voys lustich clanck aldaer ter stede Orpheus snaerspel isser niet by te ghelijcken Hier quam ick inden strick der liefden mede En derf naulijcx noch mijn herte laten blijcken Och schoon lief ick en sal v niet beswijcken Ghy blijft mijn alderliefste lief wtuercoren V liefde is te gheweldich comen strijcken Inwendich int herte, door aensien en hooren. [Folio C4v] [fol. C4v] Als ick mach hooren v lustich diuiseren Hoe ghy altoos v seluen wilt verneren Die een Coninghinne te wesen zijn waerdich Voor hooch en leech kundy paroreren Wie soude sulc een persoon niet begheren Lijf bloet en goet, wil ick om v uerteren Die int gaen en staen zijt fris en aerdich Wat ghy doet het gaet van uwer handen vaerdich Met v teere leden, ghy edele diamant Wat d’amoureuse toestaet zijt ghy in experdich Sedich van wesen, ende loyael abondant Ick segghe men Helena noyt soo begaeft en vant Lief laet mijn arbeyt doch niet zijn verloren Oorspronck der liefde was van desen brant Inwendich int Herte door aensien en hooren. Prince. Princesse Venus ontsteeckt oock in haer tvier der minnen maeckt den brant openbaer Bouen alle huysen en verciert mijn wesen, Om ons te versamen in liefde te gaer Want liefde alleen te draghen valt te swaer, Dus Goddinne verciert my met schoonheyt claer En Pallas regeert mijn tonghe, want door desen Sal ick wel vercrijghen mijns herten wtghelesen Vercoren lief, en in haer herte comen Venus weest my behulpsaem soo wert ick ghenesen Maeckt my behaghelijck by die blom der blomen Want de liefde wert hy den minnaer aenghenomen Als ieghelijck minnaer wel mach bespooren, Die hem hier van liefde iet wil beromen Inwendich int herte door aensien en hooren. Aensiet die Ionckheyt. Schiedam. Vorige Volgende
Auteursrechtvrij