Diversche refereynen ende liedekens, uut Hollant, ende Zeelant(1582)–Pieter Sterlincx– Auteursrechtvrijvan verscheyden beminders der Consten ghelesen, ende gesonghen, inde Heerlijcheyt van Heenvliet, Ten versoecke van Peeter Sterlinx, den derden September 1580 Vorige Volgende [Folio A5r] [fol. A5r] Met minnen versaemt. Rotterdam. Refereyn. Fantasije brengt my tot moeyten der sinnen Om een materij te vinden op dees vraech verheuen Veel ouer denckende, int herte binnen Wat menschen vrolijc steruen, en truerich leuen Soo heb ick mijn solutij hier op ghedreuen Die vervolch lijden, hoort het verclaeren Om den naem des Heeren soomen vint beschreuen Ghelijck Moyses van Pharo heeft moeten verhaeren Inder Woestijnen wel veertich iaeren, En van zijn eyghen volck ghehadt veel lydens groot En ueruolghing twelck hem soo ghing beswaren Dat hy wel begheerden te steruen de doot Alsulcken menschen truerich leuen, verstaetet bloot En in steruen zy haer blylijck houwen Die vervolch lijden, en vast betrouwen. Die vast betrouwen, en veruolch lijden Die steruen altesamen vrolijck inden gheest Want zy haer in goede wercken verblijden Soo datse voor gheen doot en zijn bevreest Ghelijck die Propheet Esaias heeft gheweest Die zy met een saech ouer midden ghinghen saeghen Ieremias ghesteenicht, soomen leest En Sacharias moest oock den doot verdraeghen Om dat hy Twoort Gods, had in zijn behaeghen En niet op en hielt te straffen haer sonden Sommighe zijn metten sweerde gheslaghen Al om datse die waerheyt wilden vermonden Dese leuen truerich tot allen stonden En zy verblyen haer int gaen nae der doot t’aenschouwen Die veruolch lijden en vast betrouwen. [Folio A5v] [fol. A5v] Samuel en Dauidt die op Godt betrouden vast Hebben oock ghevlucht, en veruolch gheleden, Van Sauls tirannicheyt den wreeden gast Iacop wert veruolcht van Esau meden Ioseph van zijnen broeders, verstaet dees reden Dese leefden truerich, en waren in verdriet Helias badt Godt wilt mijn ziel vant lichaem scheden Doen hem Iesabel ghinck veruolghen siet Songhen die drie Ionghelinghen inden houen niet? Om haer vast betrouwen, daer zy op bleuen staen Ghelijck Stephanus die hem steenighen liet En ghinck als doen zijn ooghen oppewaert slaen Ia sach door den Hemel Godts glorie aen Alsulcken steruen vrolijck sonder benouwen Die vervolch lijden, en vast betrouwen. Den oppersten Prince die bouen al is Worden oock veruolcht met zijn Propheten Waer dat zy quamen, zy waren inden val wis Heen veriaecht, dander doot ghesmeten, Sommighe ghevanghen, met veel tormenten beseten Dit leden zy al blijdelijck, soo die schrift wt leyt Wie Christus voetstappen volcht, en wert verbeten Voor die, heeft Godt d’eeuwich leuen bereyt Ghelijck als die Apostel Petrus seyt Dus steruen zy vrolijck die Godt acht en eert Lijt en verdraecht, en die waerheyt ontspreyt Ghelijck Paulus in Asya was ghetempteert Met droefheyt soo dat hy hem tot steruen heeft verneert Dus leuen zy truerich, en op Godt bouwen Die veruolch lijden, en vast betrouwen. Hope troost my. per VVael. Vorige Volgende
Auteursrechtvrij