Deki alenweri
Fruku mamanten. Mi no kaba opo a fensre wan bun reti, na so wan ponpon e fré kon reti na mi edesé kon tanapu na mindri fu wan palmtatji na loktu A tatji e boigi, ma no fu en, ma fu a pikinwinti. Wan man e waka kon pasa na tapu a broin skropu fu a pasi. Na alenten wi de. A man e waka safri, a no e meki esi. En broin kakibruku triki moi grati, wan leribuba e ori a bruku kon miti a blaw empi, a zéfir empi, wan ati na en ede, na en ondr'anu wan pikin blaw tas.
Tiri ete alasé. Den oto no bigin meki a babari. A kowru fu a doti e wai kon miti ju awansi den olo-olo fu a strati ori den wèt: ‘ori ai, luku bun.’
Na tapu a langa lati fu a skotu den neki nanga den topu fu a sebijari gersi grun finfini sneki di e kloru go na loktu, den o boigi go na mi no sabi pe. Den sneki fini mangri, den e blo fu teki stéfi.
Wantu pikinfowru bigin fré, e go e kon. Den grési worku deki, e warskori fu na alen di sa lusu.
Wan tra blaka ponpon na ini a pikinso krin fré dwarsi abra fu mi kruktu anu go na mi reti-anu, so kande fu firfiri a loktu te fara fu sabi san de fu du. Tra pikinfowru te jana na mi fesi na loktu tu e dukrun gwe te na ondro, ma na now trawan baka e opo meki boktu na ini hé.
A sten fu a dé e kari. A son, o suku fu kon krin a pasi gi wi ala.
Djonsro a wunjuwunju o teki waka. A degedege na tapu den lantidan.
Datimeki: wan kroboi bosi fu a rostu, a leti disi. Dan a kaba.
Auteursrechtelijk beschermd