Een nieuw sangh-boeck, iuhoudende eenighe psalmen
(1650)–J. Sent–
Auteursrechtvrij
[pagina 88]
| |
Op de wijse: Schout Babel al - ghemeyn.
WIlt nu verjubeleren
Den Coninck geeft consent
De stadt te repareren,
Van den Heydens gheschent,
V ghevanckenis ent
Rijst uyt Babels benouwen
Nae Jerusalem went
En wilt den Tempel bouwen.
2. Ghy die syt opghetoghen,
Soeckt doch den rechten gront
Doet u beste vermoghen
Ghy Hoofden t'aller stont,
Ende wilt met den mont
't Volck tot den arbeyt stouwen,
| |
[pagina 89]
| |
Woeckert wel met u pont
Wilt soo den Tempel bouwen.
3. Laet ons eendrachtich paren.
Maeckt dat den vrede wast
Niemant wil hem beswaren
Draeght geern uws naesten last,
Elck voegh hem selven vast
Als steenen wel behouwen
Die in de mueren past
wilt soo den Tempel bouwen.
4. Comt oock met kalcke spoedich
Onghevalscht wel ghebrant
De liefde overvloedich
Is den volcomen bant
Daer men met bint en spant
Die steenen in de vouwen
Dat gheeft de mueren stant
Wilt soo den Tempel bouwen
5. wilt doch met goe manieren
Vlijtich wat ghy vermeught
Den Tempel gaen vercieren
| |
[pagina 90]
| |
Schoon inwendich met deucht,
En dat ghy van u jeucht
In deuchden mocht vertrouwen
Sonder verdriet met vreucht,
Wilt soo den Tempel bouwen.
6. Costelijck sonder mincken,
Stelt u gheloof ten thoon
Latet met vreuchden blincken
Als den ghenaden Throon,
Blinckt als de Arcke schoon
Becleet als met den gouwen
Int eynde leyt de Croon,
Wilt soo den Tempel bouwen.
7. Laet oock gheensins gebreken
V Lampen Oly daer
Wilt u Lichten ontsteecken,
In desen Tempel claer,
Set op den Candelaer
Voor Mannen ende Vrouwen
Licht vry int openbaer
Wilt so den Tempel bouwen.
| |
[pagina 91]
| |
8. 'T vyer laet gestadich branden
In desen Tempel net
Elck brenght syn offerhanden
Met herten onbesmet
Dat u Godt onbeset
Ghenadich mach aenschouwen
Hout vast aen int ghebet
Wilt so den Tempel bouwen.
9. Vroom rechtveerdige zeden
Houtmen daer met aendacht
Die Borghers zijn in vreden
In liefden met eendracht
O Borghers hout goe wacht
Laet liefde niet vercouwen
Elck wil met volder cracht
Den Tempel helpen bouwen.
10. Oft yemant haet mocht dragen
In onvrede vertist
Betert u alle daghen
Aenmerckt des Satans list
Die door haet, nijt en twist,
| |
[pagina 92]
| |
Can veel onrusten brouwen
Hier in gheen tijt verquist
wilt soo den Tempel bouwen.
11. wilt doch met eernste mercken
Wat door den twist ghebeurt,
Ghy twisters met u wercken
Hebt ghy van een ghescheurt
Den Tempel dat betruert
Laet u dat vry berouwen
Dat vervallen op muert
Wilt soo den Tempel bouwen.
12. Ontsiet u niet te schamen
V Regeringe onwijs
Wilt de Schaepkens versamen
Verstroyt door quaedt advijs,
Ende gheeft Godt den prijs,
Soo sal hy u bedouwen
In vreden wilt propijs
Den Tempel helpen bouwen.
13. Gy wachters cloeck van sinnen
V op de Veste stelt
| |
[pagina 93]
| |
Bewaert u Borghers binnen
Stelt u voor haer int velt
Strijt voor haer als een Helt,
Den moet laet niet verflouwen
V hayren syn ghetelt
Wilt soo den Tempel bouwen.
14. Die u willen beletten
Te bouwen aldermeest
Wilt u teghen haer setten
Met het sweert in den gheest
Voor dat ghecroonde beest
Des Draecks veninich spouwen
En weest doch niet bevreest
Wilt so den Tempel bouwen.
15. Wilt so de stadt gaen stichten
Al op des Berghers plaen
Datse elck een mach stichten
Diese van ver sien staen
Op dat de Heydens saen
V grijpen by de mouwen
En willen met u gaen
| |
[pagina 94]
| |
Wilt so den Tempel bouwen"
16. Princen met schoone Croonen
Wilt het doch vaten plat
Dochteren ende Soonen
Des Conincx vande stadt,
Sijnen verholen schat,
Die sal hy u betrouwen
Blijft op den rechten padt
Wilt so den Tempel bouwen.
|
|