Basiorum Liber

[p. 4]

Cedite cum priscis quantum est hoc tempore vatum

Mihi Secundus unus instar omnium est.

[Ianvs Dovsa Nordovix]

[p. 5]

Quisquis Ioannis vidisti scripta Secundi

Aut coelo ductos illius effigies,

Heic ipsum, qualis vivus fuit, aspice, & ossa,

Et venerare sacrum, quod tegit ossa, solum.

[Epigramma Hadriani Marii Fratris in effigiem Joannis Secundi

ad sepulcrum suspendi destinatam]

[p. 6]

Basivm I

Cum Venus Ascanium super alta Cythera tulisset,

Sopitum teneris imposuit violis,

Albarum nymbos circumfuditque rosarum,

Et totum liquido sparsit odore locum:

Mox veteres animo revocavit Adonidis igneis.

Notus & irrepsit ima per ossa calor.

O, quoties voluit circundare colla nepotis?

O, quoties talis, dixit, Adonis erat?

Sed, placidam Pueri metuens turbare quietem,

Fixit vicinis basia mille rosis.

Ecce calent illae, cupidaeque per ora Diones

Aura, susurranti flamine, lenta subit.

Ouotque rosas tetigit, tot basia nata repente

Gaudia reddebant multiplicata Deae.

At Cytherae, natans niveis per nubila cycnis,

Ingentis terrae coepit obire globum.

Triptolemique modo, faecundus oscula glebis

Sparsit, & ignotos ter dedit ore sonos.

Inde seges felix nata est mortalibus aegris:

Inde medela meis unica nata malis.

Salvete aeternum, miferae moderamina flammae,

Humida de gelidis Basia nata rosis.

En ego sum, vestri quo vate canentur honores,

Nota Medusaei dum iuga montis erunt,

Et memor Aeneadûm stirpisque disertus amatae,

Mollia Romulidûm verba loquetur Amor.